Գերմանիայի Հալլե մշակութային անցյալ ունեցող քաղաքի շքեղ մայր տաճարում հուլիսի 18-ին բացումն է կատարվել յուրահատուկ մի համերգաշարի, որը շարունակվելու է ամբողջ օգոստոս ամսին Հայաստանումՙ պատմական այնպիսի վայրերում, ինչպիսիք են Տաթեւի, Գեղարդի եւ Սեւանի վանքերը, Սբ. Էջմիածինը, Երեւանի Կոմիտասի անվան թանգարանը եւ անշուշտՙ քույր-քաղաք Գյումրին, տեղեկացնում է Մուրիել Միրաք-Վայսբախը Գերմանիայից: Համերգաշարի մտահղացումը, գրում է նա «Միրոր-Սփեքթեյթր» շաբաթաթերթում, Ars Musica տղամարդկանց երգչախմբինն է, որն արդեն հայտնի է իր հայանպաստ գործունեությամբ: 1988-ին բարեգործական համերգ է տվել երկրաշարժից տուժածների օգտին, այնուհետեւ այլ առիթներով ելույթներ ունենալուց հետո 2018-ին դրամահավաք է կազմակերպել ի նպաստ Լինքի Հովհաննես Թումանյանի անվան միջնակարգ դպրոցի վերանորոգման:
Հայկական (հայերեն լեզվով) եւ արեւմտաեվրոպական ժամանակակից երաժշտության ընտրանի գոհարներով հագեցած համերգաշարը նախատեսված է եղել անցկացնել 2020-ին, բայց հետաձգվել է համավարակի պատճառով:
Գերմանիայում ՀՀ դեսպան Աշոտ Սմբատյանն այս առիթով նշել է, որ ուրախ է իմանալով, որ Հալլեի համերգը կրկնվելու է Գյումրիում, ինչը խթան կարող է հանդիսանալ քույր քաղաքների սերտ համագործակցության ծավալմանը: Համերգից ստացված եկամուտը հատկացվելու է Գյումրիի երաժշտանոցի գործունեության ընդարձակմանը:
Երաժշտանոցը վաղուց մտածում էր Տավիղի դասական դասընթացներ առաջարկել ցանկացողներին, բայց չէր կարողանում իրականացնել այն համապատասխան գործիքի բացակայության պայմաններում: Այժմ Արս Մուզիկայի, Միրաք-Վայսբախ հիմնադրամի եւ Հալլեի Ռոտարի Կլաբի նյութական միջոցներով հնարավոր է եղել ձեռք բերել «Վեներա» մակնիշի մեծ տավիղ (Venera Grand Concert Harp), որը պաշտոնապես նվիրվելու է Գյումրու երաժշտանոցին, այնտեղ կայանալիք համերգի օրը:
Հալլեն, ըստ հոդվածագրի, ամենահարմար վայրն է տղամարդկանց այս երգչախմբի զորակցական եւ մարդասիրական գործունեության համար:
Այնտեղ 17-րդ դարի վերջերին լյութերական աստվածաբան-հոգեւորական եւ մարդասեր Օգյուստ Հերման Ֆրանքը (August Hermann Francke, 1663-1727) անտուն երեխաներին օգնելու աննախադեպ մի ծրագիր է մշակել եւ հիմնել մի որբանոց նախնական 100 երեխաների խնամքը ապահովելու միտումով: Հետագայում գործունեությունը ծավալելովՙ որբանոցը ավելի քան 2000 երեխաների անվտանգությանն ու դաստիարակությանը նպաստող հոգեւոր օրրան է դարձել: Կրոնականի կողքին Ֆրանքը հոգացել է, որ երեխաները ստանան ամենատարբեր գիտությունների վերաբերյալ ընդհանուր գիտելիքներ եւ հնարավորություն զարգացնելու իրենց մասնագիտական հակումները: Նա նույնիսկ մանկավարժական, դեղագործական եւ հիվանդանոցային խնամքի կուրսեր է ավելացրել: Օրրանը կամ կենտրոնը մինչեւ օրս գործում է «Franckesche Stiftungen» անվան ներքո: Իսկ Ֆրանքի բարեգործական ոգին շարունակում է «Ars Musica» խումբըՙ «կարեկցանքը սահմաններ չի ճանաչում» նշանաբանի ներքո: Մշակույթը նրանց համոզմամբ նոր դռներ է բացում եւ նոր կամուրջներ կառուցում: Նման կամուրջ է երգչախմբի վերոնշյալ համերգաշարի նախաձեռնությունը: «Թող այդ նախաձեռնությունը երկար ու կանաչ ճանապարհ ունենա», մաղթում են երգչախմբի անդամները:
Նկար 2. Դեսպան Աշոտ Սմբատյանը ելույթ է ունենում տաճարում
Նկար 3. «Ars Musica»-ն ելույթ է ունենում Հալլեում
