«Սոյուզմուլտֆիլմ» ընկերությունը որոշել է հանրահայտ եւ բոլորի կողմից սիրված «Ну, погоди» (հայերեն` «Դե, սպասիր») մուլտֆիմը կրկին թողարկել, այս մասին գրում է Риа новости լրատվականը:
Ըստ ընկերության կառավարման խորհրդի նախագահ Յուլիանա Սլաշչեւայի, մուլտֆիլմի նոր թողարկումներով արդեն հետաքրքրված են բազմաթիվ երկրներ, այդ թվում`ասիական.
«Այս պահին մենք մեկնարկում ենք 26 սերիայից բաղկացած, յոթ րոպե տեւողությամբ, մի շարք: Ապագայում ծրագրում ենք այդ սերիաների քանակը հասցնել 52-ի, որովհետեւ միջազգային վաճառքի համար մեզ առնվազն 52 սերիա է հարկավոր»:
Սլաշչեւան ներկայացրել է նաեւ, որ մուլտֆիլմի նոր սերիաները կլինեն եռաչափ ձեւաչափով, այսինքն` համահունչ ժամանակներին: Որոշումը կայացվել է մոտ հինգ ամսվա ընթացքում:
«Ну, погоди»-ÇÝ (ռեժիսոր` Գենադի Սոկոլսկի, սցենարիստներ` Ալեքսանդր Կուրլյանդսկի, Ֆելիքս Կանդել, Արկադի Խայտ, ձայնագրումը` Անատոլի Պապանով, Կլարա Ռումյանովա, Իգոր Խրիստենկո) խորհրդային շրջանում նկարահանված չափազանց հայտնի մուլտիպլիկացիոն ֆիլմ է, որն ստեղծվել է «Սոյուզմուլտֆիլմ» ստուդիայում։ «Ուրախ կարուսել» («Весёлая карусель») № 1 երաժշտական ալմանախի չորս մուլտֆիլմերից մեկն է։
Մուլտֆիլմի սյուժեի հիմքում ընկած է գայլի ու նապաստակի հակամարտությունը. քաղցած գայլը հետապնդում է նապաստակին, բայց ոչ մի կերպ չի կարողանում բռնել նրան։ Յուրաքանչյուր սերիայի վերջում գայլն ասում է. «Դե, նապաստակ, դե, սպասիր» (ռուս.ՙ «Ну, Заяц, ну, погоди!»)£
«Սոյուզմուլտֆիլմ»-ը մուլտիպլիկացիոն ֆիլմերի արտադրության` խորհրդային եւ ռուսական խոշորագույն պետական կինոստուդիա է` հիմնադրված 1936 թվականին, որը գործում է մինչ օրս: Ութ տասնամայակի ընթացքում ընկերությունն ստեղծել է 1500-ից ավել մուլտֆիլմ: Դրանցից շատերը համաշխարհային անիմացիայի «Ոսկե ֆոնդ»` որպես դասական նմուշներ են համարվում եւ մասնակցել են տարբեր միջազգային կինոփառատոներիՙ ստանալով բազում պարգեւներ ու մրցանակներ:
Ընկերության ընդհանուր ակտիվները կազմում են մոտ 900 000 000 ռուսական ռուբլի, հասույթը (2017թ. տվյալներով)` 161 001 000:
