Եկող տարվա բյուջեի նախագիծը կանոնակարգային ընդհատումից հետո լրամշակված վերադարձել է խորհրդարան: Բայց էական փոփոխություններ չեն եղել:Պատգամավորներն 160 առաջարկ էին արել, որոնց գերակշիռ մասը չի ընդունվել, քանի որ դրանց ընդունումը 368 մլրդ դրամով ծախսերի ավելացման կտաներ: Ֆինանսների նախարար Ատոմ Ջանջուղազյանը, որն այս կառավարության կազմում բավական հումորով մարդ է դարձել եւ ընդդիմադիր պատգամավորների հարցերին պատասխանելիս նուրբ հումորով զվարճանում է, նշեց, որ բյուջեն կազմելիս, հետեւաբար նաեւ` պատգամավորների առաջարկները դիտարկելիս համակարգված, ռազմավարական պլանավորման մոտեցում է կիրառվել, եւ այն առաջարկները, որոնք այդ մոտեցումից դուրս են, այս պահին նպատակահարմար չէ բավարարելը: Հետագայում կարելի է այդ առաջարկներին ադրադառնալ, երբ հնարավորություններն ավելանան:
Թվերը մի փոքր փոխվել են` ընդհանուր եկամտային մասը 1 տրլն 695 մլրդ դրամ է նախատեսում, հարկային եկամուտները կանխատեսված են 1 տրլն 602 մլրդ դրամի չափով:
Ընդդիմադիր «Լուսավոր Հայաստան» ու «Բարգավաճ Հայաստան» խմբակցությունները դեմ են քվեարկելու նախագծին, քանի որ նախ` բյուջեն իրենց երազածը չէ, հետո իրենց առաջարկները չեն ընդունվել: Քվեարկությունն ամենայն հավանականությամբ տեղի կունենա ուրբաթ օրը, իշխող խմբակցությունը հազիվ թե քվեարկելու հարցում խնդիր ունենա: Այնպես որ «Իմ քայլից» Բաբկեն Թունյանի բնորոշմամբ` «Բարգավաճ Հայաստան» խմբակցությունը ժպտալով կարող է դեմ քվեարկել «կյանքը բարելավող բյուջեին»:
