Ստեփան ՊԱՊԻԿՅԱՆ, Տեխնիկական գիտությունների թեկնածու
Լույս է տեսել «ՀՀ ԳԱԱ տնտեսագիտության ինստիտուտի հետազոտական ուղին» գիրքը, 152 էջ ծավալով: Այն տպագրվել է ՀՀ ԳԱԱ Մ.Քոթանյանի անվան տնտեսագիտության ինստիտուտի գիտական խորհրդի որոշմամբ: Գրքի գիտական խմբագիրն է հարգված գիտնական, ՀՀ ԳԱԱ թղթակից անդամ, տնտեսագիտության դոկտոր,պրոֆեսոր Վլադիմիր Հարությունյանը : Գրքի հեղինակներ Վ.Լ. Հարությունյանը եւ Ռ.Ն. Սարինյանը այս բնագավառի բազմավաստակ գիտնականներ են:
ՀՀ տնտեսագիտության ինստիտուտի ստեղծումը էական նշանակություն ունեցավ մեր հանրապետության տնտեսագետների համար: Աշխատանքի առաջին մասում ներկայացված է ինստիտուտի խորհրդային շրջանըՙ 1940թ. սկսած, երբ ԽՍՀՄ ԳԱ հայկական մասնաճյուղի երկրաբանական ինստիտուտի կազմում ձեւավորվեց մի խումբ: 1941 թվականին ստեղծվում է տնտեսագիտության սեկտոր, որը 1943թ. ընդգրկվեց Հայկական ՍՍՀ գիտությունների ակադեմիայի կազմում:
2007թ. գոյություն ունեցող բոլոր գիտահետազոտական ինստիտուտները վերամիավորվեցին եւ միացվեց «ՀՀ ԳԱԱ Մ.Քոթանյանի անվան տնտեսագիտության ինստիտուտ» ՊՈԱԿ-ին: Ինստիտուտի տնօրինությունը ստանձնեց Վլադիմիր Լիպարիտի Հարությունյանը: Մինչեւ օրս նրա ղեկավարությամբ կատարվել են գիտակազմակերպչական մեծ թվով աշխատանքներ:
Սկսած 2007թ.-ից տնտեսագիտության ինստիտուտի հետազոտական ուղղություններում վերաբացվել է տնտեսագիտության եւ տնտեսագիտական մտքի պատմության բաժինը: Լույս են տեսել բազմաթիվ ուսումնասիրություններ:
Գիրքն ունի հանրագիտարանային եւ պատմագիտական բնույթ: Այն կարող է օգտակար լինել ուսանողների, դասախոսների, տնտեսագետների, գիտնականների եւ ոլորտով զբաղվող մարդկանց համար:
