Հայ եկեղեցու Մ. Նահանգների արեւմտյան թեմի Տիկնանց օժանդակ հանձնախմբի հունիսի 24-ին կազմակերպած 45-րդ ավանդական «առաջին պարահանդեսին» որպես հանդիսավար հրավիրվել է ամերիկահայ ճանաչված վիպասան Արիս Ջանիկյանը , որ 3 մեծապես գնահատված գրքերի հեղինակ է: «Bloodvine, Riverbig» եւ «This Angelic Land» հատորները տարագրության եւ ձուլման հայկական փորձառության մասին են պատմում, իսկ 2016-ին հրատարակված «Waiting for Lipchitz at Chateau Marmont» վեպը մի դրամատուրգի մասին է, որն հարստությունից աղքատության ճիրաններում է հայտնվում: Այս երրորդ գիրքը 17 շաբաթ «Los Angeles Times»-ի բեստսելլերների ցուցակում է ընդգրկված եղել:
Ջանիկյանը ծնվել եւ մեծացել է Ֆրեզնոյում, որտեղ ապրում է իր կնոջՙ Ին Սանի եւ երկու դստրերի հետ: Հոգեբանական գիտությունների դոկտորի աստիճան վաստակած գրողը 1993-2005 թվերին որպես ավագ դասախոս աշխատել է ճարտարապետության հարավային ինստիտուտում: Հեղինակ է նաեւ բանաստեղծությունների: Ակտիվ գործունեություն է ծավալում Հայոց ցեղասպանության ճանաչման ուղղությամբ: Իր նամակների շնորհիվ է, որ «Los Angeles Times» եւ «New York Times» թերթերը 2002-ին եւ 2004-ին համապատասխանաբար հրաժարվել են օգտագործել «այսպես կոչված» արտահայտությունը Հայոց ցեղասպանության մասին գրելիս:
Վերոնշյալ միջոցառմանը, որը նվիրված է եղել 22 հայ օրիորդների առաջին պարահանդեսային ելույթներին, խոսք է ասել Արեւմտյան թեմի առաջնորդ Հովնան արք. Տերտերյանը: «Տարին նվիրված է ընդհանրապես երիտասարդությանը, եւ մենք հույս ունենք, որ երեկոն ծառայելու է իրենց հոգիներում եւ սրտերում վառ պահելու սերը հանդեպ հայրենիքի եւ ժողովրդի», նշել է նա:
