ՌԱԿ ԳԵՐԱԳՈՒՅՆ ԽՈՐՀՈՒՐԴ
ՌԱԿ ԿԵՆՏՐՈՆԱԿԱՆ ՎԱՐՉՈՒԹՅՈՒՆ
Ներքաղաքական խառնակ մթնոլորտում վարչապետի պաշտոնում նախկին նախագահ Սերժ Սարգսյանի ընտրությամբ Հայաստանի Հանրապետությունը թեւակոխեց նորՙ խորհրդարանական ղեկավարման փուլՙ վերափոխված Սահմանադրությանը համապատասխան:
Հետագա ամիսներն ու տարիներն անշուշտ գործնականում ցույց կտան պետական նոր կացութաձեւի առավելություններն ու թերությունները մեր երկրի համարՙ տնտեսական, քաղաքական եւ սոցիալական զարգացման տեսակետից:
Մինչ այդՙ մեզ մնում է հաջողություն ցանկանալ նորընտիր վարչապետին եւ առաջիկա օրերին կազմվելիք նրա կառավարությանը, ի շահ ժողովրդի ու պետության, ի շահ խաղաղ, ապահով եւ բարեկեցիկ կյանքի ձգտող մեր երկրի:
Այսուհանդերձ, Ռամկավար Ազատական կուսակցությունը իր խոր մտահոգությունն է հայտնում ստեղծված ներքաղաքական իրավիճակի առթիվ: Նկատի ունենք այն ջրբաժանը, որը տարիների ընթացքում ստեղծվել է իշխանության եւ ժողովրդիՙ հատկապես վերջինիս երիտասարդական խավերի միջեւ, որը շարունակաբար խորանում է ու բորբոքում իրավիճակը երկրում: Դրա բազմանշանակ ապացույցը բողոքի եւ ընդվզման ներկա վարակիչ շարժումն է, որի հնարավոր սայթաքումներից սակայն կարող են օգտվել նաեւ արտաքին ու ներքին կասկածելի ուժեր, ինչը խիստ վտանգավոր է մեր պետության համար, հատկապես միջազգային ու տարածաշրջանային լարման ներկայիս պայմաններում:
Երիտասարդության ընդվզումը եւ բողոքը, անկախ իր այժմյան ղեկավարի նկրտումներից, պետք է չանտեսվի նորընծա կառավարության կողմից, եւ այսուհետեւ երկիրը ոչ թե ձեւական, այլ իրական բարեփոխումների ճանապարհով տանի, հասարակության բոլոր խավերի եւ առաջին հերթինՙ երիտասարդների ընդգրկմամբ, առանց խտրականության:
ՌԱԿ-ը հանդես կգա պարբերական հայտարարություններովՙ նպաստելու համար երկրում իրական բարեփոխումների անցկացման գործընթացին, կմատնանշի իշխանությունների բացթողումներն ու սխալները, վճռականորեն կմիջամտի երկրում իսկական ժողովրդավարության հաստատման ու մարդու իրավունքների պաշտպանության հարցերում:
