Վերջապես Երեւանում հասկացան, որ հրավառությունները խանգարում են մարդկանց հանգիստը: Կառավարությունը հաստատել է Երեւանի քաղաքապետ Տարոն Մարգարյանի առաջարկած այն նախագիծը, որով կենցաղային հրավառության օգտագործման սահմանափակումներ են մտցվելու: Բնակելի շենքերի անմիջական հարեւանությամբ եւ ոչ սահմանված ժամերին հրավառությունն արգելվում է: Սահմանափակումները խախտող ֆիզիկական եւ իրավաբանական անձանց նկատմամբ կիրառելիք տուգանքների չափերը տպավորիչ են. առաջին անգամվա համար` 1 մլն դրամ, երկրորդ խախտման դեպքում` 2 մլն դրամ: Դեռ պետք է որոշվեն Երեւանի վարչական տարածքների որ հատվածներում է թույլատրվելու հրավառությունը:
Երեւանյան հրավառությունը վայրենի մի բան է, այնպես որ նախաձեռնությունը գովելի է: Եթե, իհարկե, փող հավաքելու մի նոր աղբյուրի որոնում չէ պարզապես:
