Կանադայի 150-րդ եւ «Հայաստան» հիմնադրամի Տորոնտոյի մասնաճյուղի 25-րդ տարեդարձների առթիվ հայկական համայնքային կենտրոնում նոյեմբերի 12-ին կայացած տարեկան խնջույքի ժամանակ եւ տարվա ընթացքում կատարված նվիրատվությունների շնորհիվ հանգանակվել է 670 հազար կանադական (530 ամերիկյան) դոլար, որը ծախսվելու է «Ջուրը կյանք է» ընդհանուր ծրագրի իրականացման նպատակներով: Ծրագիրը առնվազն չորս գյուղերի ոռոգման ջուր է մատակարարելու, երկու շենք եւ 2 սանիտարական կայաններ է կառուցելու Արցախում եւ բնակարաններով ապահովելու երկու ընտանիքներ Գյումրիում:
Չորս հարյուրից ավելի ներկաներ (մեծ մասը համալսարանականներ) մասնակցել են բանկետին, որը մեկնարկել է Կանադայի, Հայաստանի եւ Արցախի պետական հիմներովՙ սոպրանո Արմենիա Սարգսյանի կատարմամբ, Թալին Արթինյան-Քելեպոզյանի դաշնամուրային ընկերակցությամբ: Հանդիսավար Թենի Նիկողոսյանի բացման խոսքից հետո ելույթ է ունեցել Կանադայում Հայաստանի դեսպան Լեւոն Մարտիրոսյանը : Գեղարվեստական մասն սկսվել է Համազգայինի «Էրեբունի» պարային համույթի ելույթով, որին հաջորդել են սոպրանո Լին Անուշ Իսնարի երկու երգերը եւ Արմենիա Սարգսյանի հեղինակություններից մեկըՙ իր իսկ կատարմամբ:
Օրվա բանախոսն ու պատվո հյուրն է եղել Տորոնտոյի սիմֆոնիկ նվագախմբի երաժշտական ղեկավար, ճանաչված մաեստրո Փիթեր Ունճյանը, որին էլ դեսպան Մարտիրոսյանը պարգեւատրել է ՀՀ սփյուռքի նախարարության «Կոմիտաս» շքանշանով:
Երեկոյի ընթացքում աճուրդի է հանվել Հենրիկ Մխիթարյանի ֆուտբոլային շապիկը (ջերսին)ՙ իր ստորագրությամբ, որի համար ամենաբարձր գինը (25 հազար դոլար) առաջարկել է Տորոնտոյում Հայաստանի պատվո հյուպատոս Ռիչարտ Սվազլյանը:
Հիմնադրամի երկարամյա պաշտպաններից Սարգիս Յագուբյանի առատաձեռն նվիրատվության շնորհիվ տեղի համալսարաններից բազմաթիվ ուսանողներ բանկետին մասնակցել են ձրի: Նրանցից երկուսն արժանացել են Հայաստան այցելելու մրցանակին, որպես հետեւանք հանդիսությունից առաջ «Ինչո՞ւ պետք է գնամ Հայաստան եւ ինչո՞վ կարող եմ օգտակար լինել նրան» թեմայով գրված շարադրության արդյունքների:
