ՌԴ նախագահ Վլադիմիր Պուտինը հայտարարել է, որ Ռուսաստանը պատրաստ է ԱՄՆ-ի հետ լայն գործակցություն ծավալել տիեզերական ծրագրերն իրականացնելիսՙ տիեզերքում:
Թրամփը դեռ չի պատասխանել Պուտինին, բայց եթե այդ պատասխանը դրական լինի, ապա կստացվի, որ ԱՄՆ-ն ու Ռուսաստանը լայն գործակցություն են ծավալում, բայց տիեզերքում. Երկիր մոլորակում չի ստացվում:
Պուտին. «Թիլերսոնը վատ միջավայր է ընկել»
ՌԴ նախագահ Վլադիմիր Պուտինն Արեւելյան տնտեսական ֆորումի լիագումար նիստի ընթացքում հայտարարել է, որ ԱՄՆ պետքարտուղար Ռեքս Թիլերսոնը «վատ միջավայր է ընկել»:
Պուտինը շեշտել է, որ Ռուսաստանը ժամանակին շքանշան է հանձնել ԱՄՆ-ի ներկայիս պետքարտուղարին, իսկ այժմ «նա խուզարկումներ է կազմակերպում մեր հյուպատոսարաններում»: ՌԴ նախագահը, սակայն, հույս է հայտնել, որ «փոխգործակցության քամին Թիլերսոնին անհրաժեշտ ուղու վրա կդնի»: Պուտինի խոսքովՙ չնայած այդ ամենին Ռուսաստանը շարունակում է համագործակցել Թիլերսոնի նախկին` ExxonMobil ընկերության հետ:
«Ախր ես ձեզ ի՞նչ եմ արել». Էրդողան
Դիմելով եվրոպացի քաղաքական գործիչներինՙ Թուրքիայի նախագահ Էրդողանը ասել է. «Ախր ես ձեզ ի՞նչ եմ արել»: Էրդողանն իր տարակուսանքն է հայտնել տարբեր եվրոպական երկրներում, մասնավորաբարՙ Գերմանիայում հակաթուրքական դեմարշի հետ կապված: Ի դեպ, Գերմանիայի կանցլերի նախընտրական քարոզարշավում հիմնական մրցակիցներ, գործող կանցլեր Մերկելն ու Շուլցը միակարծիք են բացառապես հակաթուրքական դաշտում: Մերկելն օրինակ հայտարարել է, թե ինքը միշտ էլ դեմ է եղել Թուրքիայիՙ ԵՄ-ին անդամակցությանը, իսկ Շուլցը նշել է, որ եթե ինքը կանցլեր դառնա, ապա կկասեցնի ԵՄ-Թուրքիա բանակցությունները, որոնց դեմ է հանդես գալիս նաեւ Ավստրիան:
Իսկ Էրդողանին հավանաբար լավ հոգեբան է պետք. մարդը անում է, հետո չի հիշում, թե ինչ է արել:
