ՄԵԹԹԵ ԲՈՔ
Դանիայից մեր հայրենակից Անահիտ Կարապետյանը «Ազգ»ին է ուղարկել, իր թարգմանությամբ, հետեւյալ գրությունը, որի հեղինակը Դանիայի մշակույթի եւ եկեղեցու հարցերով նախարար Մեթթե Բոքն է:
Եթե դժվարանում եք հասկանալ մշակույթի, լեզվի եւ պատմության նշանակությունը երկրի եւ բնակիչների համար, այցելեք Հայաստան կամ խոսեք այդ մասին Դանիայում բնակվող հայերի հետ:
Երեք գերծանրաբեռնված օրերից հետո Հայաստանից վերադարձել եմ Դանիա: Հայաստանն աշխարհի առաջին քրիստոնյա երկիրն է, սեղմված Վրաստանի, Ադրբեջանի, Պարսկաստանի եւ Թուրքիայի միջեւ… Երկիրը մինչ օրս զգում է ռուսական սառը շունչը:
Հայերի պատմությունըՙ ամուր ինքնություն ունեցող ազգի պատմություն է:
Երկիրը շատ աղետներ է տեսել:
Պատերազմներ, բռնագրավումներ, թուրքերի կողմից աքսորներ եւ սպանություններՙ հարյուր հազարավոր հայերի հանդեպ 1915-17 թթ., եւ այլն:
Բայց միեւնույնն է, երկիրը շարունակում է գոյություն ունենալ:
Իր լեզվով, գրերով եւ ամուր հավատքով աշխարհի այն տարածաշրջանումՙ որտեղ գերակշռող մասը մահմեդականներ են:
Երկրի հարուստ պատմությունն ու մշակույթը սերնդեսերունդ պատմվում եւ փոխանցվում է:
Այսօր Հայաստանից դուրս ավելի շատ հայ է ապրում, քան Հայաստանում, մոտավորապես 3 միլիոն:
Բայց հայերը շարունակում են մնալ միասնական:
Ամուր ազգՙ լի հույսով եւ հավատով դեպի ապագան:
