Սեպտեմբերից կփոխվի սոցիալական փաթեթով առողջապահական ծառայությունների մատուցման կարգը: Այս մասին արդեն կա կառավարության որոշումը: Ըստ առողջապահության նախարար Լեւոն Ալթունյանիՙ մինչեւ այժմ ապահովագրական կանխավճարային սկզբունքով մատուցվող ծառայությունները սեպտեմբերից կգործեն ապահովագրականՙ հետվճարային բանաձեւով:
Այսուհետեւ սոցիալական փաթեթիՙ աշխատակիցների համար նախատեսված գումարը չի բաշխվելու տարվա սկզբին, ստեղծվելու են ռեզերվային ֆոնդերՙ ապահովագրական ընկերությունների ներքո: Որեւէ հիվանդանոց դիմելիս անհրաժեշտ կլինի միայն զանգահարել ապահովագրական ընկերություն եւ տեղյակ պահել, որ հիվանդը որոշել է բուժվել այս կամ այն բուժհաստատությունում, որից հետո ուժի մեջ կմտնեն ապահովագրական ընկերություն-բուժհաստատություններ հարաբերությունները: Ըստ նախարարիՙ ամեն ինչ տանում է մոտավորապես մեկ-երկու տարի հետո համընդհանուր պարտադիր բժշկական ապահովագրության:
