«Ինչքան շատ տաս, այնքան շատ կստանաս: Սա է իմ նշանաբանը», նշել է «Նյուպորտ Բիչում» (Կալիֆոռնիա) բնակվող 81-ամյա գործարար Լութեր Ջոն Խաչիկյանը, ով իմնալով «Հինգ միլիոնը հինգ ակնաբուժական կենտրոնների համար» ծրագրի մասին, անմիջապես պատրաստակամություն է հայտնել հովանավորելու Հայաստանում շրջանային ակնաբուժական կլինիկաներից մեկըՙ Գյումրիինը:
Ակնաբուժական այդ կլինիկաները խնայելու են Երեւան հասնելու մարդկանց ժամանակն ու ֆինանսները:
Գյումրիի Ջոն Խաչիկյանի անվան կլինիկան չորրորդն է, եւ կրում է իր հոր անունը: Վերջինս ցեղասպանությունը վերապրողներից է, որ իր մոր ու եղբոր հետ փախչելով Թուրքիայից հաստատվել է կենտրոնական Կալիֆոռնիայում եւ զբաղվել հողագործությամբ:
Գործող մյուս կլինիկաներից մեկը (Հայկ Բոյաջյանի անվան)ՙ 2015-ին է բացվել Իջեւանում, իսկ մյուսը (Հասմիկ եւ Ջոն Մկրտչյանների անվան)ՙ բացվել է 2016-ին Սպիտակում: Նախատեսվում է Կապանի կենտրոնը բացել այս ամսվա ընթացքում: Հինգերորդը գործելու է Եղեգնաձորում:
Բոլոր հինգ շրջանները բծախնդրորեն ընտրված են եղել ՀՀ առողջապահության նախարարության կողմից ակնաբուժական մատչելի ծառայություն մատուցանելու համար տեղի բնակիչներին:
Տեղեկությունը` «Արմինյն Միրոր-Սփեքթեյթր» շաբաթաթերթից:
