Մայիսի 18-ին Ուոթերթաունի հայկական թանգարանում տեղի է ունենալու Երվանդ (Էդուարդ) Ալեքսանյանի «Հարկադրաբար դեպի Ցեղասպանություն: Օսմանյան Թուրքիայի բանակի հայ զինվորի հուշերը» (Forced to Genocide: Memoirs of an Armenian Soldier in the Ottoman Turkish Army) խորագրով հուշամատյանի շնորհանդեսը, տեղեկացնում է «Արմինյն Միրոր-Սփեքթեյթր» շաբաթաթերթը:
Գիրքը, որ հրատարակել է «Transaction Publishers» հրատարակչատունը, եզակի է իր բնույթով, քանի որ առաջին անգամ է ընթերցողին անգլերեն լեզվով ներկայացվում թուրքական բանակում հարկադրաբար ծառայող հայ զինվորի ականատեսի վկայությունները:
Հատորը, որի ներածականը գրել է Ֆրեզնոյի Կալիֆոռնիա համալսարանի Հայագիտության ուսումասիրությունների ամբիոնի պրոֆ. Սերջիո լա Պորտան , իսկ նախաբանըՙ Երուսաղեմի Ողջակիզման ինստիտուտի գործադիր տնօրեն, այժմ հանգուցյալ Իսրայել Չառնին , հայերենից անգլերեն է թարգմանել եւ խմբագրել Երվանդի դուստր Ադրիեն Ալեքսանյանը : Նա էլ մայիսի 18-ին ներկայացնելու է իր հոր հուշագրությունը: Ադրիենը դաստիարակ է եւ Էլիս Այլենդի մեդալի շքանշանակիր:
Միջոցառման հովանավորողներն են Ամերիկայի Հայկական համագումարը, ՀԲԸՄ-ն, Ուոթերթաունի հայկական թանգարանը, Հայկական լուսանկարային արխիվի SAVE ծրագիրը, եւ Հայկական ուսումնասիրությունների NAASR կենտրոնը:
Երվանդ Ալեքսանյանը ծնունդով Սվազից է (Սեբաստիա): Գրքում բացի զինվորական օրագրերից նա ընդգրկել է նաեւ պատերազմից հետո թափառումները Եվրոպայում եւ Ամերիկայում հաստատվելը 1920 թվականին:
