Նավթի համաշխարհային գներն (Brent տեսակի) երեկ շարունակել են նվազել եւ Երեւանի ժամանակով ժամը 17.00-ին ցած իջել հոգեբանականՙ 50 դոլար 1 բարելի դիմաց գնից: Դրանից մեկ ժամ անց, լոնդոնյան ICE Futures բորսայում Brent տեսակի նավթի գինը, տատանումներով հասել էր 49,47 դոլարի, այն դեպքում, երբ բորսայի բացման պահին գինը 50,09 դոլար է եղել մեկ բարելի դիմաց: Նույնՙ Երեւանի ժամանակով 18.00-ին, Նյու Յորքի NYMEX ապրանքային բորսայում WTI թեթեւ տեսակի նավթի գինը ընթացքում կազմել է 46,49 դոլար 1 բարելի դիմաց, իսկ առեւտրային գործարքների բացման պահին այն կազմել էր 47,60 դոլար:
Նավթի գների իջնելու պատճառը ԱՄՆ-ում նավթի առեւտրային պաշարներիՙ սպասվածից ավելի քիչ նվազումն է եղել, ինչի մասին հայտարարել է այդ երկրի էներգետիկայի նախարարությունը: Ոլորտի փորձագետները կարծում են, որ շուկան մոտեցել է նավթի գների այսպես ասած «հատակին», այսինքնՙ ամենացածր կետին: Հաղորդվում է նաեւ, որ նավթի գներն այս ցուցանիշից ավելի ցածր վերջին անգամ եղել էին մարտի 22-ին:
