«Խոջալուի դեպքերի 25-ամյակի առթիվ YouTube-ով փետրվարի 12-ին ցուցադրված մի տեսաֆիլմ երեւան է հանում քարոզչության նպատակով Ադրբեջանի տարածած աղավաղված պատմությունները», գրում է Կարեն Ղազարյանը «Արմինյն Միրոր-Սփեքթեյթրում»:
Տեսաֆիլմը պատմում է զինվորական լրագրող Չինգիզ Մուսթաֆայեւի մասին, ով դեպքի վայր է հասնում ուղղաթիռով եւ նկարում գետնին պառկած դիակները, որոնց զինված մարդիկ քարշ էին տալիս: «Այդ մարդիկ հայեր չէին եւ տեսնելով լուսանկարչական ապարատսՙ փախուստի դիմեցին: Հաջորդ օրը նույն վայրը նկարելիս, նկատեցի, որ դիակները այլանդակված, խեղված էին: Նախորդ օրը նման բան չկար: Ես հասկացա, որ դա արվել էր դիտավորյալ, «միջազգային հանրության» համար», պատմում է նա:
Նրա երկու օրերի նկարահանած կադրերը ապացուցում էին, որ «կոտորածը» կազմակերպված էր Ադրբեջանի իշխանությունների կողմից, բանակի այսպես կոչված «ժողովրդական ճակատի» ներկայացուցիչների կողմից, ովքեր պայքարում էին այդ ժամանակվա նախագահ Այազ Մութալիբովի դեմ:
Աղճատված դիակները քարոզչական նպատակ էին հետապնդում:
Մուսթաֆայեւը մահացել է 1992-ի հունիսի 15-ին անհայտ հանգամանքներում: Ըստ պաշտոնական վարկածի, Նախիջեւանիկ գյուղի մոտ փոխհրաձգության ժամանակ նա մահացել է ականանետի կրակից: Բայց պարզ է, որ նրան պարզապես «լռեցրել» են պատահածի մասին ճիշտ տեղեկատվություն ունենալու պատճառով: Այդուհանդերձ նրան հաջողվել էր նկարահանած կադրերը ապահով վայրում թաքցնել:
Իշխանությունների ներքին պայքարի հետեւանքով կազմակերպված «կոտորածի» մասին խոստովանել է նաեւ Այազ Մութալիբովը:
Ըստ ֆիլմի ներածականը պատմողի, Մուսթաֆայեւի տեսաժապավենը հավելյալ փաստ է վավերական նյութերի այն մեծ փաթեթի, որը բացահայտում է ազերիների հորինած պատմությունները եւ պետք է օգտագործվի ըստ այդմ:
