Փետրվարի վերջին օրերի լարվածության առթիվ տարածած հայտարարությամբ ԵԱՀԿ ՄԽ համանախագահները կողմերին կոչ են անում վերադառնալ բանակցությունների ռեժիմին: Ավելի վաղ Ադրբեջանի արտգործնախարար Մամեդյարովն ասել էր, որ Մոսկվայից ստացել է եռակողմՙ ՌԴ-Հայաստան-Ադրբեջան ԱԳ նախարարների մակարդակով հանդիպում կազմակերպելու առաջարկություն եւ տվել իր համաձայնությունը: Նման հանդիպում չկայացավ: Փետրվարի 21-22-ին Մոսկվա մեկնեց արտգործնախարար Նալբանդյանը: Պաշտոնապես դա տեղի ունեցավ ռուս-հայկական դիվանագիտական հարաբերությունների 25-ամյակի միջոցառումների շրջանակում: Նախապատրաստվում է նաեւ Ադրբեջանի արտաքին գործերի նախարարի պաշտոնական այցը Մոսկվա, լրանում է նաեւ ռուս-ադրբեջանական դիվանագիտական հարաբերությունների 25-րդ տարին:
Ի՞նչ է գործնականում կատարվումՙ այնքան էլ պարզ չէ: Փորձագետները կարծում են, որ Արցախի հարցով բանակցությունների հնարավորություն կբացվի, եթե ռուս-ամերիկյան հարաբերություններում դրական դինամիկա արձանագրվի: Իսկ դա, կարծես, դառնում է բավական հեռավոր ապագայի խնդիր: Մյուս կողմից, որքան կարելի է հասկանալ շփման գծում վերջին իրադարձությունների շուրջ իրանական կողմից արձագանքից, ԱՄՆ-Իրան հարաբերություններում հռետորաբանության կոշտացումը կարող է Ադրբեջանին հակաիրանական քայլերի գայթակղության մղել: Դրան զուգահեռ, ռուսական մամուլում սկսել են ավելի հաճախ խոսել էներգակիրների եվրոպական շուկայում Ռուսաստանին մրցակից դառնալուՙ Ադրբեջանի քայլերի մասին: Խոսքն առաջին հերթին վերաբերում է այսպես կոչված «Հարավային գազային միջանցք» նախագծին, որի իրականացման դեպքում տարեկան 10 մլրդ խմ ադրբեջանական գազ կարտահանվի Եվրոպա: Ի՞նչ հակաքայլեր է նախապատրաստում Ռուսաստանը, կամ նախապատրաստու՞մ է առհասարակ, թե՞ ամեն ինչ գտնվում է ռուս-թուրքական, այդ թվում նաեւՙ «Թուրքական հոսք» գազատարի վերաբերյալ, համաձայնությունների ծիրումՙ ենթադրությունների եւ եզրակացությունների բավական մեծ տեղ մնում է: Բայց դրանից էական շատ քիչ բան է ուրվագծվում:
Առարկայական է, որ Հարավային Կովկասում պատերազմի վերսկսումն այլեւս ոչ մեկին ձեռնտու չէ, այդ թվում ՙ նաեւ Թուրքիային: Այդ է վկայում փետրվարի 25-ին այդ երկրի ԱԳՆ տարածած հայտարարությունը: Բայց ակնհայտ է նաեւ, որ բանակցությունների վերսկսումն իրատեսական չէ, պայմանավորված է մի շարք գործոններով եւ հանգամանքներով: Եւ այս անորոշության ֆոնին ստացվում է տեղեկատվություն, որ շտապ նախապատրաստվում է Ադրբեջանի եւ Թուրքիայի նախագահների հանդիպում, իսկ Սերժ Սարգսյանը, ինչպես ՌԻԱ-Նովոստի պետական գործակալությանն ասել է ՌԴ նախագահի մամլո խոսնակը, Մոսկվա կայցելի մարտի 14-ին: Ընդ որում, դա երկօրյա պաշտոնական այց կլինի, որի ընթացքում նա կհանդիպի ՌԴ նախագահ Պուտինին: Ըստ տեղեկատվության, կքննարկվեն ինչպես երկկողմ հարաբերություններին առնչվող հարցեր, այնպես էլ «իրավիճակը Լեռնային Ղարաբաղում»:
Չափազանց ինտրիգային է, որ մարտի առաջին տասնօրյակում Մոսկվա պետք է այցելի նաեւ Թուրքիայի նախագահը: Ադրբեջանի նախագահն անցած օրերին եղել է Քաթարում եւ Պակիստանում: Վերջինում նա առանձին հանդժիպում է ունեցել Էրդողանի հետ: Չի բացառվում, որ Ալիեւը կրկին հանդիպի Թուրքիայի նախագահի հետ, բայց ավելի վաղ, քան տեղի կունենա Պուտին-Էրդողան հանդիպումը, իսկ Սերժ Սարգսյանը Պուտինին կհանդիպի Պուտին-Էրդողան բանակցություններից հետո…
Այս խճանկարից, թերեւս, մի էական գիծ կարելի է առանձնացնելՙ Ռուսաստանը նախապատրաստում է նոր եռակողմ հանդիպում: Հնարավոր էՙ առաջին փուլում դա կկազմակերպվի ԱԳ նախարարների մակարդակով, որի հաջողության դեպքում ՌԴ նախագահը հանդես կգա Պուտին-Սարգսյան-Ալիեւ բանակցությունների նախաձեռնությամբ: Տրամաբանորեն ամեն ինչ դասավորվում է ի շահ խաղաղ կարգավորման: Ի՞նչ քայլ կանի Ալիեւը վերջին պահին…
