Ջիվան Ավետիսյանիՙ «Վերջին բնակիչը» ֆիլմին «Ազգ»-ն արդեն անդրադարձել է այս տարվա օգոստոսի 19-ի համարում: Հիշեցնենք, որ ֆիլմը ներկայացված էր այս տարվա երեւանյան «Ոսկե ծիրան» կինոփառատոնի մրցութային ծրագրում, սակայն ոչ մի մրցանակի չարժանացավ:
Ֆիլմը Արցախի պատերազմի մասին է: Ավելի ճիշտՙ պատերազմի մասին չէ: Ֆիլմը պատերազմը մերկացնելու մասին էՙ այն իսպառ բացառելու հույսով:
Ցավոք «Վերջին բնակիչը» երկար չմնաց մեծ էկրանին, դա էր պահանջում փառատոնի կանոնակարգը: Բայց ֆիլմի ստեղծագործական խմբից հայտնում են, որ ֆիլմի միջազգային ցուցադրումը սկսելուց առաջ, գալիք նոյեմբերի 17-ից, մայրաքաղաքի բոլոր կինոթատրոններում հանդիսատեսը հնարավորություն կստանա նորից կամ առաջին անգամ տեսնել քարտաշ Աբգարին եւ նրա ադրբեջանցի ընկեր Իբրահիմին, ինչպես նաեւ Յուրգային… Մյուսներին, նրանց, ովքեր հանդիսատեսից պետք է հարցնենՙ «Պատերա՞զմն է ավելի ուժեղ, թե՞ մարդը»:
Նոյեմբերի 17-ից մայրաքաղաքի կինոթատրոններից դուրս եկած հանդիսատեսը պետք է պատասխանի այս հարցին եւ պետք է մտածի…
