Արարատի մարզի Նորաշեն գյուղի գյուղապետ Արտուշ Սարգսյանը կարգադրել է գյուղապետարանի դիմաց գտնվող Գարեգին Նժդեհի արձանը հանել: Ըստ գյուղացիների վկայությանՙ գյուղապետի այս որոշման պատճառն այն է, որ ամեն անգամ աշխատանքի գնալիս արձանը խփել է գյուղապետի գլխին: Դե քանի որ ինչ-որ բան խանգարում է գյուղապետի աշխատանքին, ու եթե անգամ այդ խանգարողը Գարեգին Նժդեհն է, ապա պետք է հանել, գյուղապետին չէ, այլ ինչ-որ բանը: Արձանը, կրկին ըստ գյուղացիների վկայության, հիմա անմխիթար վիճակում է, խոտերի մեջ:
Ի դեպ, Նորաշենի գյուղապետը նախկինում ՕԵԿ-ի, հետոՙ ԲՀԿ-ի, ապաՙ ՄԱԿ կուսակցությունների անդամ է եղել, իսկ հիմա հանրապետական է: Իսկ ինչպես գիտենք, մեր երկրում հանրապետականն է որքան ուզումՙ խփում, մինչդեռ հանրապետականին ոչ ոք չի կարող որքան ուզենաՙ խփի: Բայց դա կարեւոր չէ, կարեւորն այն է, որ Նժդեհը խանգարում է հանրապետականին, չնայած երբ ԱԺ-ում ՀՀԿ խմբակցության ղեկավարին լրագրողները խնդրել են կարծիք հայտնել տեղի ունեցածի վերաբերյալ, մարդը շատ տրամաբանական հարց է տվելՙ «Արտուշ Սարգսյանն ո՞վ է»:
Այսքան շատ կուսակից ընկերներ ունենալն էլ մի բան չէ:
