Թուրքիայի խորհրդարանում HDP կուսակցությունից հայազգի պատգամավոր Կարո Փայլանը հարց է տվել վարչապետ Բինալի Յըլդրըմին, թե ինչու է քանդվել Տրապիզոնի Հաջիա Սոֆիա եկեղեցին եւ վերածվել մզկիթի: Նա հիշեցրել է վարչապետին, որ այդ վանքը 1250-1260-ական թվերին կառուցվել է Մանուել Ա-ի կողմից, թանգարանի վերածվել 1964-ին, իսկ 2013-ին հանձնվելով «Վաքըֆների գլխավոր վարչության» տնօրինությանը վերածվել է մզկիթի: Տեղի են ունեցել շինարարական փոփոխություններ, որոնցից ամենահատկանշականները շարժական միջնորմով բաժանված առանձին սրահն էՙ կանանց համար, «միհրաբը»ՙ մատուռի փոխարեն, որմնանկարների վերացումը եւ հատակի խճաքարերի փոխարեն տախտակամածի եւ գորգերի տեղադրումը:
Փայլանը նշել է, որ այդ տարածքում արդեն երեք մզկիթ է գործում եւ հարցրելՙ ճիշտ չէ՞ր լինի արդյոք այն պահպանել որպես պատմական հուշարձան, փոխանակ մզկիթի վերածելու: Նա նաեւ տեղեկացրել է, որ մզկիթի վերածելը հակասում է փոքրամասնություններին իրենց սեփականությունները վերադարձնելու AKP կառավարության որոշումին:
