ԱՆՇԱՐԺ ԳՈՒՅՔԻ ՇՈՒԿԱՆ ԱՐՁԱԳԱՆՔԵՑ ԱՊՐԻԼՅԱՆ ՊԱՏԵՐԱԶՄԻՆ
Գործարքների քանակը ապրիլին նվազել է
Անշարժ գույքի կադաստրի պետական կոմիտեիՙ շուկայի վերլուծության տվյալների համաձայն, 2016-ի ապրիլին Հայաստանի անշարժ գույքի շուկայում գործարքների քանակը նվազել է: Այսպես` իրականացվել է 14951 գործարք, ինչը 2,3 տոկոսով քիչ է մարտի եւ 4,9 տոկոսովՙ 2015-ի ապրիլի գործարքների քանակի համեմատ: Զուտ օտարման գործարքների քանակը ապրիլին մարտի համեմատ նվազել է 6,9 տոկոսով, իսկ 2015-ի ապրիլի համեմատՙ 4,8 տոկոսով:
Քանի որ հիմնական գործարքները կատարվում են Երեւանում եւ բազմաբնակարան շենքերի բնակարանների նկատմամբ, դիտարկենք այստեղ արձանագրված ցուցանիշները: Երեւանում առքուվաճառքի գործարքների 61,1 տոկոսը շենքերի բնակարանների առքուվաճառքն է եղել: Մարտի համեմատ, ապրիլին դրանց քանակը Երեւանում նվազել է 2,9 տոկոսով, իսկ նախորդ տարվա ապրիլի համեմատ փոքր-ինչ` 1,1 տոկոսով աճել:
Ինչ վերաբերում է գներին, ապա բնակարանների շուկայական միջին գները դրամով արտահայտված Երեւանում գրեթե անփոփոխ ենՙ ապրիլին մարտի համեմատ աճել են 0,02 տոկոսով: Ըստ վարչական շրջանների, Երեւանում բնակարանների 1 քմ մակերեսի միջին շուկայական գները այսպիսին են եղել.
| Վարչական շրջաններ | Միջին գները (դրամ) ապրիլ 2015թ. | Միջին գները (դրամ) ապրիլ 2016թ. | Միջին գները (դրամ) մարտ 2015թ. |
| Կենտրոն | 428000 | 428000 | 428000 |
| Արաբկիր | 356600 | 357000 | 356900 |
| Քանաքեռ-Զեյթուն | 282700 | 283100 | 283000 |
| Նոր-Նորք | 253100 | 254150 | 253950 |
| Ավան | 260650 | 261500 | 261500 |
| Էրեբունի | 251900 | 252300 | 252300 |
| Շենգավիթ | 257050 | 257600 | 257600 |
| Դավթաշեն | 275700 | 276650 | 276550 |
| Աջափնյակ | 250000 | 250900 | 250850 |
| Մալաթիա-Սեբաստիա | 243200 | 244000 | 243950 |
| Նուբարաշեն | 156750 | 157250 | 157200 |
Մարզերում ապրիլին վաճառվել են 287 բնակարաններ, որոնց քանակը մարտի համեմատ դարձյալ նվազել էՙ 16,1 տոկոսով, իսկ 2015-ի ապրիլի համեմատՙ 15,8 տոկոսով:
Երեւանից հետո, ամենաթանկ բնակարանները 2016-ի ապրիլին եղել են Ծաղկաձորում, որտեղ 1 քմ մակերեսի շուկայական գինը կազմել է 292 հազար դրամ: Աբովյանում 1 քմ գինը 155 հազար դրամ է կազմել, Վաղարշապատում (Էջմիածնում)` 154 հազար դրամ, Նոր Հաճընում` 128 հազար դրամ, Եղեգնաձորում` 126 հազար դրամ, Գորիսում` 123 հազար դրամ, Արմավիրում` 121 հազար դրամ, Իջեւանում` 118 հազար դրամ, Աշտարակում` 116 հազար դրամ 1 քմ դիմաց ցուցանիշներով: Բնակարանների միջին գները մարզերում ապրիլին մարտի համեմատ աննշան աճել են 0,06 տոկոսով:
2016-ի ապրիլին Հայաստանում գրանցվել է անհատական տների առքուվաճառքի 284 գործարք, որից 112-ըՙ Երեւանում: Մայրաքաղաքում անհատական տների առքուվաճառքի գործարքների քանակը 2016-ի ապրիլին մարտի համեմատ աճել է 20,4 տոկոսով, իսկ մարզերում` նվազել 36,3 տոկոսով: 2015-ի ապրիլի համեմատ թե՛ Երեւանում, թե՛ մարզերում անհատական բնակելի տների առքուվաճառքի գործարքների քանակը նվազել է:
Միջինացվածՙ 250 քմ շինության մակերես եւ 400 քմ տնամերձ ունեցող անհատական տների 1 քմ-ի միջին գները (ներառյալ տնամերձի միավորի գինը) 2016-ի ապրիլին մարտի համեմատ անփոփոխ են մնացել: Ըստ Երեւանի վարչական շրջանների, գներն այսպիսին են եղել.
| Վարչական շրջաններ | Միջին գները (դրամ) ապրիլ 2015թ. | Միջին գները (դրամ) ապրիլ 2016թ. | Միջին գները (դրամ) մարտ 2015թ. |
| Կենտրոն | 476100 | 476100 | 476100 |
| Արաբկիր | 383000 | 383000 | 383000 |
| Քանաքեռ-Զեյթուն | 295000 | 295000 | 295000 |
| Նորք-Մարաշ | 319200 | 319200 | 319200 |
| Ավան | 270500 | 270500 | 270500 |
| Էրեբունի | 239750 | 239750 | 239750 |
| Շենգավիթ | 255000 | 255000 | 255000 |
| Դավթաշեն | 276000 | 276000 | 276000 |
| Աջափնյակ | 250050 | 250050 | 250050 |
| Մալաթիա-Սեբաստիա | 238000 | 238000 | 238000 |
| Նուբարաշեն | 150800 | 150800 | 150800 |
Մարզերում միջինացված են 200 քմ շինության եւ 1000 քմ տնամերձ մակերեսով անհատական տների վերաբերյալ գները: Ամենաթանկ անհատական տները Երեւանից հետո դարձյալ Ծաղկաձորում են`1 քմ-ն 305 հազար դրամ: Երկրորդը Աբովյանն է 1 քմ-ն 157 հազար դրամ, երրորդը Վաղարշապատը, որտեղ 1 քմ-ն կազմել է 153 հազար դրամ: Ապա գալիս են Աշտարակըՙ 136 հազար դրամ, Ջերմուկը` 131 հազար դրամ, Գորիսը` 130 հազար դրամ, Նոր Հաճնը` 129 հազար դրամ, Իջեւանըՙ 123 հազար դրամ, Բյուրեղավանը` 120 հազար դրամ, Գյումրին` 118 հազար դրամ 1 քմ դիմաց: Անհատական տների միջին գները ապրիլին մարտի համեմատ մնացել են անփոփոխ:
Հողերի առքուվաճառքի գործարքների քանակն Հայաստանում 2016-ի ապրիլին 2015-ի ապրիլի համեմատ եւս նվազել է 12,2 տոկոսով, աճուրդով վաճառքներինը` 8,9 տոկոսով: Հիպոթեքային գործարքների թիվը 2016-ի ապրիլին 140-նն է եղել (97-ը Երեւանում), ինչը 2,2 տոկոսով ավելի է մարտի եւ անփոփոխ 2015-ի ապրիլի համեմատ:
Այսպիսով, Հայաստանի անշարժ գույքի շուկայում ապրիլին արձանագրվել է գործարքների քանակի նվազում, ինչը հիմնականում պայմանավորված է ամսվա առաջին օրերին ծավալված պատերազմական գործողությունների ուժգնացմամբ : Անշարժ գույքի շուկան, ինչպես միշտ, առաջինն է արձագանքում նման դեպքերում, արձանագրելով ակտիվության նվազում: Եվ ընդհակառակը, տնտեսական անգամ երկարատեւ եւ բարձր աճի դեպքում դրական անդրադարձն անշարժ գույքի շուկայի վրա ամենավերջինն է տեղի ունենում:
