ՌԴ Պետդումա է ներկայացվել «ԽՍՀՄ նախագահ Մ.Ս. Գորբաչովի եւ ՌԴ առաջին նախագահ Բ.Ն. Ելցինի քաղաքական գործունեությունը հանցավոր ճանաչելու մասին» հայտարարության նախագիծ:
Տվյալ նախաձեռնությամբ հանդես է եկել Լիբերալ-Դեմոկրատական խմբակցությունը, որն առաջարկում է պետական մակարդակով գնահատական տալ Գորբաչովի եւ Ելցինի կառավարման արդյունքներին, դրանք ճանաչելով «հանցավոր եւ քայքայիչ»:
«ԽՍՀՄ փլուզումը, ազգամիջյան գժտությունները, բազմաթիվ զինված հակամարտությունները, հիվանդացության եւ մահացության ցուցանիշների, ալկոհոլամոլների եւ թմրամոլների թվի աճը, 90-ականներին միլիոնավոր քաղաքացիների կենսամակարդակի աղետալի անկումըՙ այս ամենը տեղի ունեցավ ոչ պատահաբար», հայտարարել են խմբակցությունում:
Նախագծում նշվում է, որ «վերակառուցման» եւ «ելցինյան բարեփոխումների» բացասական քաղաքականությունը վատթարացրեց երկրի ներքին վիճակը եւ պետության միջազգային դիրքերը:
ՏԱՍՍ գործակալությունը հիշեցնում է, որ ավելի վաղ բեմադրիչ Նիկիտա Միխալկովը առաջարկել էր պետական մակարդակով հանցավոր ճանաչել ԽՍՀՄ փլուզմանը հանգեցրած Գորբաչովի ու Ելցինի քաղաքականությունը:
