ՊԱՅՔԱՐԵԼ ՉԳԻՏԵՆ, ԶԲԱՂՎԵԼ ԳԻՏԵՆ

ՀՈՎԻԿ ԱՖՅԱՆ

Կառավարության աշխատակազմի ղեկավար-նախարար Դավիթ Հարությունյանը կառավարության վերջին նիստում հայտարարել է, որ չնայած ՀՀ կառավարությունը լուրջ բարեփոխումներ է իրականացնում, սակայն պարբերաբար բախվում է կոռուպցիոն դրսեւորումների, հենց այդ պատճառով էլ պայքարըՙ կոռուպցիայի դեմ մնում է առաջնահերթություն: Դրանից ելնելով էլՙ մշակվել է 2015-18-ի կոռուպցիայի դեմ պայքարի ռազմավարություն, որի շրջանակներում Հայաստանը ԱՄՆ կառավարությունից խնդրել է աջակցություն, մասնավորապեսՙ ներգրավել միջազգային փորձագետների, որոնք իրենց գործունեությամբ ապացուցել են, որ կարողանում են աջակցել երկրներինՙ ստեղծելու կոռուպցիայի դեմ պայքարի արդյունավետ մեխանիզմներ: Հարությունյանը նշել է նաեւ, որ Հայաստանում նման փորձագետներ չկան: Ծրագրի իրականացման համար էլ, այսինքնՙ միջազգային փորձագետներին վարձելու համար ԱՄՆ կառավարությունը կհատկացնի 750 հազար դոլարՙ պայմանով, որ ՀՀ կառավարությունը եւս կունենա իր նյութական աջակցությունը: Հետաքրքրական է, թե չգիտի՞ արդյոք ՀՀ կառավարությունը, որ կոռուպցիայի դեմ պայքարի մի միջոց կա. պետք է պարզապես դրանով չզբաղվել: Չծխելու պես մի բան է, դժվար է, բայց եթե ուզում ես թարգել ծխելը, ուրիշ ելք չկա: Հուսանք, որ ԱՄՆ կառավարությունից եկած 750 հազար դոլարը Հայաստանում պարբերաբար չի բախվի կոռուպցիոն դրսեւորումների: