Վաշինգտոնից Դանիել Սարոյանը տեղեկացնում է, որ Ամերիկայի հայկական համագումարում հիշել եւ գնահատել են ՄԱԿ-ի նախկին գլխավոր քարտուղար Բուտրոս Բուտրոս-Ղալիի ջանքերն ուղղված Ղարաբաղում տեւական խաղաղություն հաստատելուն:
«Համագումարի աշխատակիցները խոր կսկիծով լսեցին 93 տարեկանում նրա մահվան լուրը: Հայերս մշտապես երախտապարտ կլինենք նրան դիվանագիտական այն միջոցառումների համար, որ նա անհապաղ ձեռնարկեց հակադարձելու Ադրբեջանի բռնություններին ընդդեմ Ղարաբաղի ազատասեր ժողովրդի», ասել է այդ առթիվ Հայկական համագումարի գործադիր տնօրեն Բրայան Ադրունին :
1992-ի մարտին Բուտրոս Ղալին Ղարաբաղ էր գործուղել ՄԱԿ-ի Գլխավոր քարտուղարի հատուկ բանագնաց Սայրոս Վենսին, միջնորդելու որ թշնամանքը էլ ավելի չսրվի: Դա ՄԱԿ-ի կողմից ձեռնարկված առաջին քայլն էր, որ տեղի էր ունենում Հայաստանի ՄԱԿ-ին անդամակցելուց ընդամենը երկու շաբաթ անց:
Բուտրոս Ղալին եգիպտացի դիվանագետ էր եւ 1992-96 թվերին դարձավ ՄԱԿ-ի 6-րդ գլխավոր քարտուղարը: Առաջինը այդ բարձր պաշտոնումՙ Աֆրիկյան մայրցամաքից: Պաշտոնավարության ընթացքում նա հրատարակեց իր «Խաղաղության հուշատետրը» («An Agenda for Peace») վերլուծական հատորը, որը քննության էր առնում կանխարգելիչ դիվանագիտության, խաղաղարարության եւ խաղաղապահպանման ՄԱԿ-ի կարողությունները ընդլայնելու հնարավորությունները:
