Հունվարի 30-ին, շաբաթ օրը, ՀՀ սփյուռքի նախարարությունում տեղի ունեցավ 2016 թ. ստեղծագործական եւ գիտական աշխատանքների համահայկական հերթական մրցանակաբաշխությանը նվիրված աշխատանքային նիստ, ղեկավարությամբ նախարար Հրանուշ Հակոբյանի: Նիստին մասնակցում էին Համաշխարհային հայկական կոնգրեսի եւ Ռուսաստանի հայերի միության նախագահ Արա Աբրահամյանը, Հայաստանում նրա տեղակալներ Վլադիմիր Աղայանը, Արամ Սարգսյանը, Գրողների միության նախագահ Էդվարդ Միլիտոնյանը, ԳԱԱ նախագահության ներկայացուցիչՙ ակադեմիկոս-քարտուղար Հրանտ Մաթեւոսյանը, Ժուռնալիստների միության նախագահ Աստղիկ Գեւորգյանը, ԳԱԱ Պատմության ինստիտուտի տնօրեն, ակադեմիկոս Աշոտ Մելքոնյանը, ակադ. Ստեփան Պետրոսյանը, ստեղծագործական տարբեր կազմակերպությունների ներկայացուցիչներ:
Ավանդական դարձած մրցանակաբաշխությունը, որը կազմակերպվում է Համաշխարհային հայկական կոնգրեսի, Ռուսաստանի հայերի միության եւ ՀՀ սփյուռքի նախարարության համատեղ ջանքերով եւ Արա Աբրահամյանի նյութական աջակցությամբ, այս տարի անցկացվելու է Հայաստանի Հանրապետության անկախության 25-ամյակի առթիվ: Այս տարվա մրցանակաբաշխության ընդհանուր ֆոնդը կազմում է 42 մլն դրամ:
Աշխույժ քննարկման ընթացքում վերջնականապես որոշվեցին այն ոլորտները, որոնց զարգացմանը նպաստելու համար են տրամադրվելու մրցանակները արվեստի տարբեր ճյուղերի, լրագրության եւ հումանիտար գիտությունների բնագավառներում:
«Մրցանակաբաշխություն-2016»ը կմեկնարկի փետրվարի կեսերին, իսկ արդյունքները կամփոփվեն ընթացիկ տարումՙ մրցանակաբաշխությանը մասնակցող կազմակերպությունների եւ միությունների կողմից սահմանված ժամանակահատվածում, որի վերաբերյալ առաջիկա շաբաթ կհրապարակվի մանրամասնյալ հայտարարություն:
