Կարծում է Die Zeit-ի հրատարակիչը
Գերմանական Die Zeit թերթի հրատարակիչ Յոզեֆ Յոֆֆեի կարծիքով, հակամարտության հետեւանքով Սիրիան կմասնատվի: Մի մասում կմնան Ասադը եւ ալավիները, մյուսը կանցնի սուննիներին, իսկ նրանց արանքում կլինեն ռուսական եւ իրանական ռազմակայաններ: Յոֆֆեն իր կանխատեսումն արել է Der Tagesspiegel թերթին տված հարցազրույցում: Նրա խոսքերով, Ռուսաստանը եւ Իրանը Սիրիա մտան Ասադին փրկելու, մինչդեռ Արեւմուտքն ուզում է «Ասադին տեսնել դժոխքում»:
Ըստ Յոֆֆեի, մասնատումը տեղի կունենա մոտավորապես հինգ տարի հետո: Սակայն նա վստահ է, որ այդ լուծումը կայուն չի լինելու. իրադրությունը մշտապես շիկանալու է շիա-սուննի կրոնական պատերազմի պատճառով:
Die Zeit-ի հրատարակիչը նաեւ պատմել է, որ «Իսլամական պետության» դեմ մղվող պայքարում միասնական ղեկավար ուժ չկա: Իսրայելն ու Ռուսաստանը Սիրիայում խաղաղ գոյակցելու եղանակ են գտել, բայց ուժերը չեն միավորել: Իսրայելցիները գրոհներ են ձեռնարկում «Հզբոլլահին» հասցեագրված իրանական մատակարարումների վրա, բայց չեն դիպչում ռուսներին (եւ ընդհակառակը): Գերմանական եւ բրիտանական ռազմօդանավերը իրենց գործողությունները ըստ երեւույթին համաձայնեցնում են ԱՄՆ կենտրոնական հրամանատարության հետ, իսկ ֆրանսիական օդուժը վարվում է մերթ այսպես, մերթ այնպես, նշել է Յոֆֆեն:
Թուրքերը հավանաբար չեն համակարգում իրենց գործողությունները, քանի որ նրանք կռվում են առավելապես արեւմտամետ քրդերի դեմ, իսկ Սաուդյան Արաբիան զբաղված է Եմենով: «Իսկ Օբաման խույս է տալիս ղեկավարումից, ինչպես կատուն ջրից», կարծում է Յոֆֆեն: Նա վստահ է, որ Սիրիայում անհրաժեշտ է չվակարգման լավ ծառայություն, քանի որ այդ երկրի երկնքում արդեն նեղվածք է:
