Իրաքցի զինվորականները ԱՄՆ-ին մեղադրել են «Իսլամական պետության» գրոհայիններին զենքով օգնելու մեջ, գրում է «Վաշինգտոն փոստ» թերթը:
Շիաների ջոկատներից մեկի հրամանատար Մուստաֆա Սաադին հայտարարել է, որ դա բնավ կասկած չի հարուցում: «Եթե ամերիկացիները դադարեցնեն օգնությունը, ապա մենք իսլամիստներին կջախջախենք մի քանի օրում», գտնում է Սաադին:
Նա մանրամասնել է, որ ինքը քանիցս տեսել է, թե ամերիկյան ուղղաթիռները ինչպես են զենք հասցնում գրոհայիններին: Նման առաքումների ականատեսն են դարձել նաեւ իրաքցի զինվորականների բարեկամներն ու հարազատները, գրում է թերթը:
Ավելի վաղ իրաքցի քաղաքական գործիչները եւ շիաների լրատվամիջոցները քանիցս հայտարարել էին ԻՊ գրոհայինների հետ ԱՄՆ-ի գործարքի մասին: «Վաշինգտոն փոստը» դա համարում է Իրաքի կառավարության պառակտման վկայություն: Որոշ նախարարներ ուզում են ամերիկացիներին ներկայացնել իբրեւ թշնամիների, որպեսզի մերձենան Իրանի հետ:
Իրաքի պաշտպանության նախարարության մամլո քարտուղար Նասիր Նուրին հայտարարել է, որ երկրի ռազմական գերատեսչությունը չի հավատում ԱՄՆ-ԻՊ գործարքի գոյությանը: Սակայն, ինչպես նշում է Ռեգնում գործակալությունը, Իրաքում շատերը համոզված են, որ իրողությունը ճիշտ հակառակն է:
