«Հայաստանի Հանրապետության եւ Եվրասիական զարգացման բանկի միջեւ «Ոռոգման համակարգերի արդիականացում» ծրագրի ֆինանսավորման համար Եվրասիական տնտեսական ընկերակցության հակաճգնաժամային հիմնադրամի միջոցներից «ներդրումային վարկի տրամադրման մասին» համաձայնագիրը երեկ հավանության է արժանացել կառավարության կողմից: Համաձայնագրով նախատեսվում է Հայաստանի Հանրապետությանը տրամադրել ներդրումային վարկ` 40 մլն դոլարի չափով: Ծրագրի շրջանակում նախատեսվում է բարձրացնել ոռոգման համակարգերի արդյունավետությունը, մեծացնել ոռոգվող հողերի մակերեսը, զարգացնել կառավարչական կարողությունները, ինչպես նաեւ բարձրացնել ջրօգտագործողների միավորումների տեխնիկական հագեցվածությունը եւ այլն:
Եվս մեկ` Հայաստանի Հանրապետության եւ Ասիական զարգացման բանկի միջեւ 2015թ. հոկտեմբերի 19-ին ստորագրված «Սեյսմիկ անվտանգության բարելավման ծրագիր-արդյունքների վրա հիմնված փոխատվություն» (հատուկ գործառնություններ) վարկային համաձայնագիրը, որով նախատեսվում է Հայաստանին տրամադրել վարկ` 88,5 մլն դոլարի չափով, նույնպես երեկ հավանության արժանացավ կառավարության կողմից: Ծրագրի նպատակն էՙ բարձրացնել դպրոցների շենքերի սեյսմակայունությունը, հզորացնել սեյսմիկ աղետի պատրաստվածության եւ արձագանքման կարողությունները, բարելավել սեյսմիկ աղետի ռիսկի կառավարման եւ նվազեցման համար օժանդակող քաղաքականությունները եւ համակարգերը:
