Հայ ժողովրդի հարազատ ծնունդ եւ ազգային տենչերի արտահայտիչ ՌԱԿ-ն իր անսակարկ հայրենասիրությամբ նախանձախնդիր է անհատի եւ հավաքականության բնական իրավունքների եւ շահերի գերակայության կիրառմանը եւ բարեշրջումների միջոցով ինքնիշխան պետականության կատարելագործմանը: ՌԱԿ-ի ծրագրային դրույթներում ամրագրված է, որ մարդկության առաջընթացը եւ սոցիալական ներդաշնակությունը հնարավոր են միայն հավաքական պետական կառավարման` Ազատականության (լիբերալիզմ) եւ ժողովրդի գերիշխանության` Ռամկավարության (ժողովրդավարություն) կիրառման դեպքում:
Այսօր` տնտեսական ու սոցիալական բնագավառներում տագնապ եւ արեւելյան հարեւանի հետ պատերազմական վիճակ ապրող հանրապետությունում, երբ հայ ժողովուրդը կանգնած է իր գոյատեւման եւ հետագա առաջընթացին վերաբերող արմատական ու բախտորոշ որոշումների կայացման շեմին, ՌԱԿ-ը որպես գործունեության ուղենիշ` իր նպատակն է համարում նպաստել հայկական պետականության ամրապնդմանը, որը լայն հնարավորություններ կտա ժողովրդին ապրել ազատ ու անկաշկանդ: Ինչպես նաեւ, գլխավոր առաքելություն է համարում ՀՀ-ի ազգային պետականության շինարարության եւ հասարակական-տնտեսական բարեշրջումների բնագավառներում ռամկավարական եւ ազատական սկզբունքների արմատավորումն ու կիրառումը:
Ելնելով դրանից եւ ՀՀ-ում քաղաքացիական հասարակության եւ իրավական պետության հաստատման անխաթար ձգտումից` ՌԱԿ պատգամավորական ժողովը հայտարարում է, որ կողմ է առաջադրվող Սահմանադրական փոփոխություններին եւ կոչ է անում սատարել դրանց իրագործմանը:
