Հինգշաբթի օրը Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանը որոշում է կայացրել ցմահ ազատազրկված Սողոմոն Քոչարյանին` հիվանդության հիմքով վաղաժամ ազատ արձակելու մասին:
Հիշեցնենք, որ Քոչարյանը 1995-ին դատապարտվել էր` սկզբում մահապատժի, ապա (մահապատժի վերացումից հետո) ցմահ ազատազրկման իրանահպատակ ադրբեջանցու սպանության համար եւ արդեն երկու ամիս է, ինչ ծանր վիճակում հիվանդանոցում է: Նա տառապում է սրտի իշեմիկ հիվանդությամբ` 4-րդ աստիճանի սրտային անբավարարությամբ, ունի հետինֆարկտային քրոնիկ անեւրիզմա, հիվանդ է նաեւ թոքաբորբով: Համաձայն կառավարության 825-Ն որոշման, այս հիվանդություններով նա ենթակա է պատժից ազատման` «պատժի կրման հետ անհամատեղելի հիվանդությունների» հիմքով:
Քոչարյանը ներկայումս գտնվում է «Գրիգոր Լուսավորիչ» բժշկական կենտրոնի սրտաբանական բաժանմունքում:
Կրկնում ենք եւ շեշտում, Սողոմոն Քոչարյանը վաղաժամ ազատ է արձակվել բացառապես վերոհիշյալ հիմքով:
