Երեկ Երեւանի ավագանու հերթական նիստի ընթացքում մի շարք քաղաքացիների շնորհվել է Երեւանի պատվավոր քաղաքացու կոչում: Նրանք են` երաժիշտ Երվանդ Երզնկյանը, երգչուհի Ռաիսա Մկրտչյանը, երգիչ Ռուբեն Մաթեւոսյանը եւ բռնցքամարտիկ Արթուր Աբրահամը: Քաղաքապետ Տարոն Մարգարյանը ընդգծել է, որ բոլոր 4 անձինք էլ հայտնի ու սիրված մարդիկ են. «Նրանց ճանաչում են թե՛ Հայաստանում, թե՛ Հայաստանից դուրս»:
Բայց այստեղ մի խնդիր կա. Երեւանի պատվավոր քաղաքացիներից վերջինը` շատ հարգելի Արթուր Աբրահամը, հենց բնակվում է Երեւանից եւ Հայաստանից դուրս` Գերմանիայում: Եւ կոնկրետ նրան պատվավոր քաղաքացի դարձնելով մենք կարող ենք ստեղծել մի իրավիճակ, երբ Երեւանի բոլոր պատվավոր քաղաքացիները ապրելիս լինեն Երեւանից դուրս, Երեւանում ապրելը դարձնելով անպատվաբեր, կամ, առնվազն, ոչ անհրաժեշտ:
