Մեծ գոհունակությամբ տեղեկացանք Մայր աթոռ Սբ. Էջմիածնի կայքէջից, որ վերջերս Ամենայն հայոց հայրապետը «Սուրբ Սահակ-Սուրբ Մեսրոպ» շքանշանն է շնորհել մեր տաղանդաշատ դաշնակահար, վաստակավոր երաժիշտ, Կոմիտասի անվան կոնսերվատորիայի պրոֆեսոր Սվետլանա Նավասարդյանին: Շքանշանի տվչության հանդիսավոր արարողությունը տեղի է ունեցել Սբ. Էջմիածնում, Գարեգին Բ ամենայն հայոց կաթողիկոսի նախագահությամբ: «Հայրենանվեր եւ ազգօգուտ ծառայության, երաժշտության ոլորտում ունեցած նվաճումների համար» շնորհված շքանշանը ստանալու առթիվ արտասանած խոսքում դաշնակահարուհին, որն ունի բազմաթիվ մրցանակներ ու կոչումներ, ասել է, որ իրեն համար այդ պարգեւը բացառիկ նշանակություն ունի:
Մեր ընթերցողների ու մեր կողմից շնորհավորում ենք մեր բազմավաստակ արվեստագիտուհուն:
