Շվեդիան պատրաստ է գնել ուկրաինական սեւահողի միլիոնավոր տոննաներ: Հնարավոր գործարքի մասին տեղեկացնող շվեդական լրատվամիջոցները նշում են, որ ուկրաինական արգավանդ հողը կարող է օգտագործվել Շվեդիայի հողերի հարստացման նպատակով:
«Դագենս նյուհետեր» թերթի տվյալներով, ուկրաինական արգավանդ սեւահողի մեկ տոննան կարժենա ընդամենը 5 եվրո: Գնորդի համար գործարքը խիստ շահավետ է: Շվեդները կգնեն Պոլտավայի մարզի 50-100 մլն տոննա սեւահող եւ կօգտագործեն իրենց Դալարնա նահանգում:
Ստոկհոլմի պաշտոնական ներկայացուցիչները այս տեղեկությունները չեն մեկնաբանել: Բանն այն է, որ Ուկրաինայի օրենսդրությունն արգելում է հողերի վաճառքը: Տարածքները կարող են 50 տարով վարձակալման տրվել գյուղատնտեսական օգտագործման նպատակով: Սակայն օրենքում ոչինչ չի ասված բնահողի մասին: Նշանակում էՙ դրա վաճառքը չի արգելվում: Ուկրաինական ԶԼՄ-ները հաղորդում են, որ գործարարները վաղուց օգտվում են օրենսդրության այդ սողանցքից եւ վագոններով սեւահող են դուրս տանում երկրից:
Շվեդ լրագրողները հիշեցնում են, որ արգավանդ սեւահողը Կիեւի համար դարձել է եկամուտների հուսալի աղբյուր: Ճգնաժամի պայմաններում օտար երկրի ներդրողները մեծացնում են երկրի գյուղատնտեսական ոլորտի վերահսկողությունը: Land Matrix գործակալության տվյալներով, ամենքից շատ ուկրաինական վարելահողեր ունի ԱՄՆ-ը: 450 հազար հեկտար ուկրաինական հողերի սեփականատերերի թվում են ամերիկյան «Մոնսանտո», «Քարգիլ» եւ «Դյուպոն» ընկերությունները: Շվեդիան ի դեմս Agrokultura AB եւ East Capital ընկերությունների տնօրինում է 103,7 հազար հեկտար ուկրաինական հողեր: Ուկրաինայի տնտեսության անկայուն վիճակը օտարերկրացիներին ընձեռում է շահավետ գործարքների կնքման հնարավորություն: Ուկրաինայի գյուղատնտեսությանը վարկեր են պետք սերմացու եւ սարքավորումների ձեռքբերման համար, բայց այժմ տոկոսադրույքները 30 տոկոս են, իսկ գրիվնայի արժեզրկումը կտրուկ ավելացրել է հողագործների ծախսերը: Ուստի պաշտոնական Կիեւը ծախծխում է սեւահողը եւ վարձակալության տալիս հողերը արեւմուտքցի այն ներդրողներին, որոնք փող ունեն գյուղհանդակները մշակող ուկրաինացիների վարձելու համար:
