Հուլիսի 16-ին Երեւանում 78 տարեկանում վախճանվել է Հակոբ Ջամբազյանը: Մահվան պատճառը կրկնակի կաթվածն էր: Նա ամերիկյան միսիոներների հիմնած TWR-ի (Trans World Radio) հայկական խմբագրության երկարամյա ղեկավարն էր: Ծնվել էր Երուսաղեմում, արաբական դպրոցում ուսանելուց հետո 11 տարեկանում տեղափոխվել էր Հորդանան, Շվեյցարիայում ավետարանական դպրոցում աստվածաբանական կրթություն ստացել, այնուհետ աշխատել Լիբանանումՙ իբրեւ ռադիոմիսիոներ: 1975-ին տեղափոխվել էր գերմանական Վեցլար, շարունակել ռադիոյի իր աշխատանքը: 1988-ի Սպիտակի երկրաշարժից հետո սկսել էր օգնության ծրագրեր իրականացնել Հայաստանում: 1994-ին Հայաստանում հիմնել է Հայաստանի օգնության կենտրոնը, որը նեցուկ է լինում ավելի քան 5000 երեխայի ու նրանց ընտանիքներին: Արմեն Ամիրյանի հետ Երեւանում հիմնադրել էր «Արմենակոբ» ռադիոհեռուստատեսությունը: Իր երաժիշտ տիկնոջՙ Քնար Ջամբազյանի հետ հեղինակել է 1000- ից ավելի երաժշտական ստեղծագործություն, դրանց թվում նաեւՙ Հայոց ցեղասպանության զոհերի հիշատակին մի ռեքվիեմ, որը հեռարձակվել է ռադիոյով:
Գերմանական առցանց քրիստոնեական լրատվական կայքերից մեկը փոխանցում է, թե TWR-ի փոխնախագահ Վերներ Քրյոմերը բարձր է գնահատել Ջամբազյանի վաստակըՙ նկատել տալով, որ նա Հայաստանի համար հաղորդումներից բացի ռադիոծրագրեր է պատրաստել Մերձավոր Արեւելքի, պարսկախոս աշխարհի 3եւ Թուրքիայի համար:
«Ազգ»ի խմբագրության ու մեր խորազգաց ցավակցությունները տիկնոջըՙ Քնարին, երեք որդիներին:
