ՄԱԿ-ի հրապարակած զեկույցի համաձայն, մարդկության պատմության ողջ ընթացքում մարդիկ դեռ երբեք այսքան լավ, երկար, անվտանգ եւ բարեկեցիկ չեն ապրել, որքան հիմա:
Միեւնույն ժամանակ, սոցիալական հետազոտություններ անցկացնող մի շարք միջազգային կազմակերպություններ պարզել են, որ մարդկության պատմության ողջ ընթացքում մարդիկ դեռ երբեք իրենց այսքան դժբախտ չեն համարել, որքան հիմա:
Առանց մեկնաբանության:
Տարբեր շփման գծեր
Անցած օրերին ԼՂՀ ՊԲ-ից տեղեկացրեցին, որ հակառակորդը ինտենսիվորեն խախտում է հրադադարի ռեժիմը` «ղարաբաղա-ադրբեջանական շփման գծի ողջ երկայնքով», ընդ որում օգտագործելով գնդացիրային զինատեսակներ նաեւ:
Այս լարվածության համապատկերում, հուլիսի 22-ին ԵԱՀԿ դիտորդական խումբը, հակամարտ կողմերի հետ ձեռք բերված պայմանավորվածությունների համաձայն, դիտարկում է անցկացրել շփման գծի` մեր կողմից ԼՂՀ Մարտակերտի շրջանի Թալիշ գյուղի արեւելյան ուղղությամբ եւ արձանագրել, որ կրակի դադարեցման ռեժիմը դիտարկում անցկացնելու պահին չի խախտվել:
Հետեւաբար, կա՛մ ԵԱՀԿ դիտորդական խումբը դիտարկում է անցկացրել ամենեւին էլ ոչ մեր շփման գծում, կա՛մ էլ ԵԱՀԿ-ն այսուհետ նման դիտարկումներ անցկացնելուց առաջ չպետք է հակամարտ կողմերի հետ պայմանավորվածություն ձեռք բերի, այլ պետք է մի տեսակ հանկարծակիի բերի նրանց:
