Տեղեկատվության դիմացՙ 60 մլն պեսո
Մեքսիկական հատուկ ռեժիմի բանտից թմրաբարոն Խոակին Գուսմանի փախուստից հետո ձերբակալվել են նույն բանտի 49 աշխատակիցներ, այդ թվում տնօրենը, բանտապահները եւ վարչական անձնակազմը: EFE գործակալությունը նշում է, որ նրանց կասկածում են Էլ Չապո («Կարճլիկ») մականունով հայտնի Գուսմանի փախուստին օժանդակած լինելու մեջ:
Գործի քննությունը ղեկավարելու համար Մեքսիկայի ներքգործնախարար Միգել Անխել Օսորիո Չոնգը ընդհատել է Ֆրանսիայում իր սկսած շրջագայությունը: Մեքսիկացի քաղաքական գործիչները ենթադրում են, որ Էլ Չապոն փախուստի համար օգտագործել է ոչ միայն կաշառքներ, այլեւ անձնակազմի ընտանիքների հետ կապված սպառնալիքներ:
Գերխիստ ռեժիմի «Ալտիպլանո» բանտից Գուսմանը փախուստի է դիմել հուլիսի լույս 12-ի գիշերը, օգտվելով 10 մետր խորության վրա փորված սողանցքից, որի վերջնամասում նստել է մոտոցիկլետ: Ջրցողարանից սկիզբ առնող սողանցքն ունի 1,5 կմ երկարություն: Թմրաբարոնի հետ մեկտեղ «Ալտիպլանոյից» փախել են նրա հինգ թիկնապահները:
Սա միլիարդատեր Խոակին Գուսմանի արդեն երկրորդ փախուստն է հատկապես խիստ ռեժիմի բանտերից: 2001 թ. հունվարին կազմակերպված առաջին փախուստի ժամանակ նա թաքնվել էր լվացքատար ֆուրգոնում:
ԱՄՆ հակաթմրադեղային վարչությունը Էլ Չապոյին համարում է աշխարհում թմրանյութերի առեւտրով զբաղվող ամենավտանգավոր հանցագործներից մեկը եւ ժամանակին 5 մլն դոլար պարգեւավճար էր խոստացել նրան վերաբերող տեղեկատվության համար:
Թմրաբարոնը երկրորդ անգամ ձերբկալվել էր 2014 թ. փետրվարին Մասատլան առողջարանային քաղաքում: ԱՄՆ-ը պահանջել էր հանձնել նրան, բայց մեքսիկական դատարանը ժամանակավորապես արգելել էր նրա արտահանձնումըՙ պարզաբանելով, որ հանցագործը պետք է նախնական պատիժը կրի հայրենիքում:
Գուսմանը 1990-ականներից գլխավորում է «Սինալոա» կարտելը: Ենթադրվում է, որ այդ կազմակերպությունը մատակարարում է ԱՄՆ թափանցող բոլոր թմրանյութերի մոտ 1/3-ը: «Սինալոան» համարվում է Մեքսիկայի երկու խոշորագույն թմրակարտելներից մեկը: «Ֆորբս» հանդեսի տվյալներով, «Կարճլիկը» աշխարհի ամենահարուստ մարդկանց ցանկում է: Էլ Չապոն նաեւ առավել ազդեցիկ անձանցից մեկն է: Նա փաստորեն մեն-մենակ վերահսկում է ԱՄՆ-ի կոկաինային ամբողջ շուկան: ԱՄՆ-ում թմրանյութերի անօրինական տարածումից Գուսմանը տարեկան ստանում է մոտ 323 մլն դոլար: Նրա հանցավոր սինդիկատի անդամների թիվն անցնում է հազարից:
2012 թ. Ուսամա բեն Լադենի սպանությունից հետո ԱՄՆ-ի իշխանությունները Գուսմանին համարում էին աշխարհի թիվ 1 հանցագործը:
Մեքսիկայի տարածքում վերջին հինգ տարում թմրավաճառների հանցախմբերի պատերազմում սպանվել է ավելի քան 37 հազար մարդ:
Մեքսիկայի իշխանությունները հուլիսի 14-ին հայտարարեցին, որ պատրաստ են 60 մլն պեսո (3,8 մլն դոլար) վճարել Էլ Չապոյին վերաբերող «ամբողջական, ճշմարտացի եւ թարմ տեղեկատվության» դիմաց:
