Վարչապետի զգուշացումը ԾԻԳ-երի ղեկավարներին
«Տարիներ շարունակ ԾԻԳ-երի միջոցով երկրում միլիարդների հասնող ներդրումներ են իրականացվել, սակայն, որպես կանոն, ավելի շատ խոսվում է կոռուպցիոն սկանդալների, չարաշահումների, քան իրականացված աշխատանքների մասին», այս մասին երեկ կառավարության նիստի սկզբում ասաց վարչապետ Հովիկ Աբրահամյանը, անդրադառնալով մի քանի օր առաջ կառավարությունում տեղի ունեցած ԾԻԳ-երի 2015թ. առաջին եռամսյակի գործունեության հաշվետվությունների քննարկմանը: Ըստ վարչապետի, այդ քննարկման ժամանակ ինքը խստագույնս զգուշացրել է ԾԻԳ-երի ղեկավարներինՙ զերծ մնալու կոռուպցիոն դրսեւորումներից: «Հակառակ դեպքում ոչ միայն կազատվենք նման պաշտոնյաներից, այլեւ անձամբ հետամուտ կլինեմՙ օրենքի ամբողջ խստությամբ վերջիններիս պատասխանատվության ենթարկելու հարցում: Այս գործընթացներում հրապարակայնության ապահովումն անհրաժեշտություն է, ի վերջո քաղաքացին, հասարակությունը պետք է իմանան, թե որտեղ եւ ինչպես են ծախսվում ներգրավվող ֆինանսական միջոցները», նշեց վարչապետը:
