Մայիսի 6 – Ավելի վաղ գրել էինք, թե Լյուքսեմբուգը ցանկություն ունի ճանաչել Հայոց ցեղասպանությունը, չորեքշաբթիՙ մայիսի 6-ին լյուքսեմբուրգյան «Թագեբլաթը» ծանուցում է, թե երկրի խորհրդարանը միաձայն ճանաչել է դարասկզբի Հայոց ոճիրը։ Քրիստոնյա սոցիալիստական ժողովրդական կուսակցության պատգամավոր Լաուրենթ Մոզարի ներկայացրած բանաձեւըՙ ցեղասպանություն բառեզրի հստակ սահմանմամբ խորհրդարանի հավանությանն է արժանացել։ Բանաձեւը սատարել են խորհրդարանի բոլոր քաղաքական խմբակցություններն ու խմբերը, ուստի այն ընդունվել է միաձայն։
Հայոց ցեղասպանությունը 20-րդ դարի առաջին սիստեմատիկ ցեղասպանությունն է։ 1915-16-ին հարյուր հազարավոր հայեր իրենց ազգային պատկանելիության համար կոտորածների ու մահվան քայլերթի զոհ դարձան։ Սպանվեցին նաեւ ասորիներ, արամեացիներ, Պոնտոսի հույներ։ Զոհերի վերաբերյալ ճշգրիտ թվական տվյալներ չկան, բայց մի քանի հարյուր հազարից մինչեւ 1,5 միլիոն են հասնում, նշում է լյուքսեմբուրգյան լրատուն։ «Այս բանաձեւը Թուրքիայի դես չէ», մայիսի 6-ին ընդգծել է պատգամավոր Մոզարը խորհրդարանում։ Լյուքեմբուրգն ու Թուրքիան բարեկամական հարաբերություններ ունեն։ Ոճրագործներն այլեւս կենդանի չեն, իսկ նրանց ժառանգները չեն կարող իրենց նախնիների մեղքերի համար պատասխանատվության կրել, ասել է Մոզարըՙ շեշտելով, թե հարցն առավելաբար պատմական մեղքի ճանաչման մասին է։ Հայոց ցեղասպանության դատապարտումը ուժեղ ազդանշան է, ուղերձ, որ այլեւս երբեք նման բան չկրկնվի», ասել է Քրիստոնյա սոցիալիստական ժողովրդական կուսակցության պատգամավոր Լաուրենթ Մոզարըՙ հիշատակելով այն 22 երկրների խորհրդարաններին ու կազմակերպություններին, որ արդեն ճանաչել են Հայոց ցեղասպանությունը։ Իսկ Գերմանիայի առնչությամբ էլ հայտարարել է, թե մոտ օրերս այդ երկիրն էլ Հայոց ցեղասպանությունը ճանաչող մի բանաձեւ կընդունի։
Թերթը հաղորդում է, թե երեքշաբթիՙ մայիսի 5-ին արդեն թուրքական համայնքը Լյուքսեմբուրգում բողոք է հայտնել խորհրդարանիՙ Հայոց ցեղասպանության հստակ դիրքորոշման առիթով։
