Charlie Hebdo-Ն ԱԶՆԻՎ ԽՈՍՔ Է ՏԱԼԻՍ
Մահմեդականների սուրբ Մուհամմեդ մարգարեի ծաղրանկարները հրապարակելով հայտնի դարձած փարիզյան Charlie Hebdo պարբերականի գլխավոր ծաղրանկարիչ Ռենալդ Լուզիեն հայտարարել է, որ իրենք խոսք են տալիս այլեւս երբեք Մուհամեդ մարգարեի ծաղրանկարները չհրապարակելու:
Մահմեդական ծայրահեղական խմբավորումներն իրենց հերթին դեռ չեն հայտարարել, որ խոսք են տալիս այլեւս երբեք չհարձակվել Charlie Hebdo-ի խմբագրության վրա: Չի բացառվում, որ սպասում են պարբերականի հաջորդ համարին` համոզվելու:
Փաստորեն մարտի 18-ին
Քուվեյթ մեկնելուց առաջ Թուրքիայի նախագահ Էրդողանը օդանավակայանում պատասխանել է լրագրողների հարցերին: Այն հարցին, թե ինչո՞ւ պարոն նախագահը Չանաքքալեի` ապրիլի 24-ին նշված հաղթանակի միջոցառուներին չէր հրավիրել երկրի ընդդիմադիր կուսակցությունների նախագահներին, Էրդողանը պատասխանել է. «Ճիշտ ասած տեղյակ չեմ` հրավիրե՞լ են, թե՞ ոչ, բայց այսքանն ասեմ. ես 12 տարի այս երկրում վարչապետ եմ եղել եւ ոչ մի անգամ ոչ Քըլըչթարօղլուին, ոչ Բայքալին, ոչ էլ հարգելի Բահչելիին (թվարկում է ընդդիմադիր առաջնորդներին- Հ. Ա.) Չանաքքալեում չեմ տեսել: Կրկնում եմ` մենք ամեն տարի մարտի 18-ին Չանաքքալեում միջոցառումներ ենք անում, ես այնտեղ եմ լինում, բայց նրանցից ոչ մեկին այնտեղ չեմ տեսել»:
Անցած տարիներին չգիտենք, բայց այս տարի չի բացառվում, որ պարոնայք Քըլըչթարօղլին, Բայքալը եւ հարգելի Բահչելին մասնակցել են Չանաքքալեի միջոցառումներին հենց այդ միջոցառումների անցկացման ավանդական օրը` մարտի 18-ին, ու քանի որ Էրդողանն ինքը մարտի 18-ին Չանաքքալեում չի եղել, չէր էլ կարող հանդիպել այդ մարդկանց:
Իսկ ապրիլի 24-ին, կոնկրետ քրդամետ Ժողովրդա-դեմոկրատական կուսակցությունը իր ողջ ղեկավար կազմով մասնակցել է Պոլսում կայացած Ցեղասպանության զոհերի ոգեկոչման արարողությանը:
