Հայոց ցեղասպանության տարելիցին նվիրված միջոցառումներն այս տարի անսպառ են: Եվ ահա եւս մի նախաձեռնություն. օրերս տեղի ունեցավ «Հատուցման գինը» գրքի շնորհանդեսը Գիրքը պատմատնտեսագիտական վերլուծություն է նվիրված Հայոց ցեղասպանության ընթացքում հայ ժողովրդի կրած նյութական կորուստներին: Նշեմ, որ գրքի հեղինակը Հայկ Բեջանյանն է, որը նշեց, որ այն գրելիս օգտվել է բազմաթիվ պատմական աղբյուրներից, որոնց հիման վրա հանրագումարի են բերվել հայ ժողովրդի կրած նյութական կորուստները. «Այդ ամբողջական վիճակագրական ցուցանիշի հիման վրա իրականացվել է տնտեսամաթեմատիկական հաշվարկ, որն արտացոլում է կորուստները մերօրյա համարժեքով: Ըստ այդմ Հայ ժողովրդի նյութական կորուստները 1919թ. դրությամբ կազմում են 19 միլիարդ ֆրանկ, որի այսօրվա համարժեքն ավելի քան 46 միլիարդ ԱՄՆ դոլար է»:
Հայկ Բեջանյանը նկատում է նաեւ, որ անգնահատելին մարդկային կորուստներն են, եւ կատարված տնտեսագիտական հաշվարկները չեն հավակնում դառնալ այն միլիոնավոր մարդկանց անունների հաշվարկ, որոնք կապրեին ու կարարեին Ցեղասպանությունը չլինելու դեպքում:
Նշենք, որ «Հատուցման գինը» գիրքը լույս է ընծայվել Հայաստանի երիտասարդական հիմնադրամի եւ ՀՊՏՀ ուսանողական խորհրդի նախաձեռնությամբ:
