Մարտի 17-18-ը Երեւանում տեղի կունենա Արեւելյան գործընկերության Եվրոնեսթ խորհրդարանական վեհաժողովի չորրորդ նիստը: Լիագումար նիստը մարտի17-ին է, ԱԺ նիստերի դահլիճում, մինչ այդ կանցկացվի Եվրոնեսթի ԽՎ-ի բյուրոյի դռնփակ նիստ: Լիագումար նիստը բացելու է ՀՀ ԱԺ նախագահ Գալուստ Սահակյանը, լինելու է Հայաստանի նախագահ Սերժ Սարգսյանի ուղերձը: Եվրոխորհրդարանի նախագահ Մարտին Շուլցի ուղերձը ներկայացնելու է Եվրոխորհրդարանի փոխնախագահ Ռիչարդ Չարնեցկին: Կհաջորդեն Եվրոնեսթի համանախագահների ուղերձները:
Մարտի 16-ին, մինչեւ լիագումար նիստը, տեղի կունենան այս կազմակերպության հանձնաժողովների նիստերը` տնտեսական ինտեգրման, մարդու իրավունքների, սոցիալական, կրթական, էներգետիկ անվտանգության հարցերով:
Այս նիստը լավ առիթ է Հայաստանի համար մեկ անգամ եւս հստակեցնելու եորոպական ուղղության հնարավորություններն ու աշխատանքի ոլորտները, իսկ եվրոպական քաղաքական խմբերի հետ ոչ պաշտոնական շփումները լավ առիթ կտան քննարկելու Հայաստանին այս պահին ներկայացող մարտահրավերները եւ, ինչու չէ, Հայոց ցեղասպանության թեմայով համագործակցելու հարթակներ գտնելու համար:
Եվրոնեսթ ԽՎ-ի բյուրոյի անդամները կհանդիպեն նաեւ Հայաստանի նախագահի հետ:
