ՀԱԿՈԲ ԱՍԱՏՐՅԱՆ, Պրահա, ՕՐԵՐ ամսագիր
Մարտի երկրորդ շաբաթը բավականին հագեցած կլինի Չեխիայում Հայոց ցեղասպանության միջոցառումների անցկացման առումով: Նախ, մարտի 9-ին Չեխիայի Երաժշտության թանգարանի մեծ սրահում կբացվի «Հայոց ցեղասպանությունը միջազգային մամուլի առաջին էջերում» ցուցահանդեսը, որի կազմակերպիչներն են Հայաստանի Ազգային ժողովը, Չեխիայի խորհրդարանի Միջնորդությունների կոմիտեն, Երեւանի Ցեղասպանության ինստիտուտ-թանգարանը եւ Չեխիայում Հայաստանի դեսպանությունը: Ցուցահանդեսում ամփոփված են 1890-ական թվականների համիդյան ջարդերից մինչեւ 1915-23 թվականների ցեղասպանության տարիներին միջազգային մամուլի առաջին էջերում տպագրված լուսանկարներն ու հոդվածները, որոնք դեռեւս մեկ դար առաջ արձանագրել են հայ ժողովրդի նկատմամբ իրականացված ոճրագործությունը: Ցուցահանդեսի բացմանը ներկա կգտնվի ԱԺ փոխխոսնակ Էդուարդ Շարմազանովի ղեկավարած պատվիրակությունը:
Հաջորդ օրը, մարտի 10-ին ժամը 18-ին, Պրահայի Կարլի համալսարանի իրավաբանական ֆակուլտետում կանցկացվի «Ցեղասպանության հանցագործությունըՙ իրավական եւ քաղաքական ասպեկտները» խորագրով գիտաժողովՙ նվիրված Օսմանյան Թուրքիայում Հայերի ցեղասպանության 100-ամյա տարելիցին: Գիտաժողովի կազմակերպիչներն են Կարլի համալսարանի իրավաբանական ֆակուլտետը եւ ԷԼՍԱ եվրոպական իրավաբան ուսանողների ընկերակցությունըՙ համագործակացությամբ Չեխիայում Հայաստանի դեսպանության եւ Պրահայի «Չարիքի հնէաբանություն» ցեղասպանությունների ուսումնասիրության կենտրոնի:
Գիտաժողովում Հայաստանի պաշտոնական տեսակետը կներկայացնի Ազգային ժողովի փոխխոսնակ Էդուարդ Շարմազանովը, իսկ ցեղասպանության իրավական ասպեկտներըՙ Հայաստանի Սահմանադրական դատարանի ներկայացուցիչ, դոկտոր Վլադիմիր Վարդանյանը:
Գերմանիայի Բոխումի համալսարանի դոկտոր, պրոֆեսոր Միհրան Դաբաղը կներկայացնի ցեղասպանությունների համեմատական բնութագիրը եւ ժամանակակից ռիսկերն ու մարտահրավերները:
«Չարիքի հնէաբանություն» կազմակերպության նախագահ Շիմոն Կրբեցը կխոսի ցեղասպանության մոտիվների ու պատճառների մասին:
Մարտի 11-ին Պրահայի գերմանական Գյոթե ինստիտուտում «Արդարամիտների այգի» կազմակերպությունը կանցկացվի մի այլ գիտաժողովՙ «Երեկ եւ այսօր. արդարությունը միշտ անհրաժեշտ է»ՙ համագործակցությամբ Չեխիայում Հայաստանի դեսպանության: Գիտաժողովում ելույթներ կունենան իտալացի հայտնի լրագրող Անտոնիո Ֆերրարին, Չեխիայի նախկին արտգործնախարարներ Ցիրիլ Սվոբոդան եւ Կարել Շվարցենբերգը, Հայաստանի դեսպան Տիգրան Սեյրանյանը, հայագետ Միլադա Կիլյանովան եւ գլխավոր կազմակերպիչըՙ Արդարամիտների այգիՙ Gariwo-ի նախագահ Անդրեաս Պիերալին: Գիտաժողովի ավարտին ելույթ կունենա Կարլի համալսարանի նվագախումբըՙ մաեստրո Հայկ Ութիջյանի գլխավորությամբ:
