Անկախ լրագրող Ժան Էսքիյանը Փարիզից տեղեկացնում է, որ «Nouvelles d՛Arme՛nie» ամսագրի հունվարյան համարը բացահայտում է այն գաղտնի համաձայնությունը, որի հետեւանքով 2012-ին տապալվեց հայերի Ցեղասպանության ժխտումը քրեականացնող Վալերի Բուայեի օրենքը: Ֆրանսահայ ամսագրի շապիկին «Սահմանադրական խորհուրդ: Հյուբեր Հենելի վտանգավոր կապերը» խորագիրն է:
Հյուբերը, 72 տարեկան, նախկին սենատոր է եղել, ով Ֆրանսիայի Սահմանադրական դատարանի աշխատակազմին է միացել 2010-ին: Նա միաժամանակ Ֆրանսիայում գործող թուրքամետ քարոզչություն իրականացնող «Բոսֆորի ինստիտուտին» աջակցող անձնավորություն է: Ցեղասպանության ժխտումը քրեականացնող օրենքի ընդունումից հետո թուրքամետ ուժերը բողոքարկելով այն Սահմանադրական խորհրդին ուղարկեցին: 2012 թվի փետրվարի 1-ին էլեկտրոնային հաղորդագրություններ են փոխանակվել Հյուբերի եւ Թուրքիայի նախկին արտգործնախարար Յաշար Յակըշի միջեւ: Այդ հաղորդագրությունները հայտնաբերվել են Yahoo-ի քննարկումների էջում: Յակըշը մասնավորապես գրել է. «Սիրելի եւ մեծ ընկեր, չեմ կարող ուրախությանս մասնակից չդարձնել Թուրքիայի մեծ ընկերներիս: Կարծում եմ սա հաստատապես կփոխի հոսանքի ուղղությունը: Գործը հիմա ձեր ձեռքերում է»: Սրան Հյուբերը պատասխանել է. «Ձեզ նման ես էլ հանգիստ շունչ եմ քաշում: Մենք 30 օր ունենք որոշում կայացնելու: Վիճակը նետված է»:
Փետրվարի 28-ին (2012 թ.) Հյուբերը դարձյալ գրել է Յակըշին. «Այսօր ժամը 17.00-ին հանրությանը կներկայացվի Սահմանադրական խորհրդի որոշումը: Դուք գոհ կլինեք», որին Յակըշը պատասխանել է. «Եթե դուք եք ասում, ուրեմն չեմ կարծում, որ հուսախաբ կլինեմ»:
Այդ նույն օրը տապալվեց Վալերի Բուայեի օրենքը:
