Անկեղծորենՙ ԱՐՇԱՎԻՐ ԳՅՈՆՋՅԱՆ, Մոնրէալ
Ի պատասխան Գալիպոլիի տոնակատարությունների հրավերին
Ստորեւ անգլերենից թարգմանաբար ներկայացնում ենք Ռամկավար Ազատական կուսակցության Կենտր. վարչության նախկին ատենապետ, ՀԲԸՄիության Կենտր. վարչության նախկին փոխնախագահ, Թեքեյան մշակութային միության Մ. Նահանգների եւ Կանադայի Կենտր. վարչության անդամ, հայտնի գյուտարար-ֆիզիկոս, Մոնրեալի Մկգիլ համալսարանի պրոֆեսոր Արշավիր Գյոնջյանի կոչը ուղղված համայն հայությանը:
Սիրելի հայրենակիցներ,
Թեւակոխել ենք ճակատագրական 2015 թվականը: Ենթադրվում է, որ Հայաստանի հայերը, մասնավորապես Հայաստանի Հանրապետության պետական կառույցները եւ սփյուռքահայերը բազմաթիվ հանձնախմբերի միջոցով պատրաստում են Ցեղասպանության հարյուրամյակը նշելու հուսալի եւ արդյունավետ ծրագրեր, որոնց մենք ականատես կլինենք հառաջիկա շաբաթներին եւ ամիսներին:
Բոլորիս ցանկությունն այն է, որ տեսնենք, թե այդ միջոցառումները ազդեցիկ լինեն եւ ի վերջո որոշակի բեկում առաջացնեն միջազգային ասպարեզում ի նպաստ Հայ դատին: Այդուհանդերձ, երեւի առաջինը չեմ նկատելու եւ ափսոսանք հայտնելու, որ դժբախտաբար մենք ի վիճակի չենք եղել այն աստիճան կազմակերպված ձեւով հանդես գալու, որ միջազգային ասպարեզում ուժեղ քաղաքական ազդեցություն ունենայինք եւ նախ պահանջեինք Թուրքիայից ընդունելու հայերի Ցեղասպանության պատասխանատվությունը եւ ապա ակնկալեինք նրանից համապատասխան փոխհատուցում:
Այս փուլում մենք պետք է շարունակենք պնդել, որ վաղեմության օրենսդրական ակտ գոյություն չունի ցեղասպանության հանցագործության համար եւ 2015 թվականը հայերիս համար արդարություն եւ փոխհատուցում պահանջելու վերջին հնարավորությունը չէ:
Հաջորդ կարեւոր կետն այն է, որ մենք պետք է լավ կազմակերպված եւ ազդեցիկ ծրագիր ունենանք, որպեսզի կարողանանք հակադարձել թուրքական անխուսափելի հակաքարոզչական ցունամիին, որն անկասկած առաջ է մղվելու հառաջիկա ամիսներին, ընդհուպ ապրիլի 24-ը ներառյալ:
Թուրքական կառավարությունն արդեն կատարել է ձեռնածուական իր մեծ հնարքը, հայտարարելով, որ Գալիպոլիի հաղթանակի տոնակատարությունները տեղի են ունենալու 2015 թվի ապրիլի 24-ին: Նրանք հարյուրից ավելի պետությունների բարձրաստիճան ղեկավարներին են հրավիրել մասնակցելու այդ տոնակատարություններին, որոնք կկայանան հենց հայերի Ցեղասպանության հարյուրամյակի օրը:
Սա մի մեծ մարտահրավեր է ուղղված մեզՙ աշխարհով մեկ ցրված 8 միլիոնից ավելի հայերիս, որին պարտավոր ենք համապատասխանորեն արձագանքել, ամոթանքի միջազգային սյունին գամելու համար թուրքական խորամանկությունը: Ինչպիսի՞ն կլիներ համաշխարհային հանրության արձագանքը, եթե Հոլոքոսթի տարելիցի օրը Գերմանիայի կառավարությունը տոնախմբություններ կազմակերպեր նշելու համար Ֆրանսիայի նվաճումը եւ Հիտլերի հաղթական երթը Փարիզում: Կարծում եմ մեկնաբանություններն ավելորդ են:
Եկեք օգտվենք այն փաստից, որ թուրքերը շատ շուտ բացահայտեցին իրենց հակաքարոզչական դավադրությունը: Մենք դեռ երեք ամիս ունենք, որպեսզի ազգովին հակադարձենք եւ համապատասխան վրդովմունքի արտահայտություններով ողողենք միջազգային մամուլի էջերը: Հայաստանի նախագահը պատշաճորեն եւ քաղաքավարի կերպով է պատասխանել Էրդողանի վիրավորական հրավերին:
Իմ այս հակիրճ ակնարկի նպատակն այն է, որ մենքՙ սփյուռքահայերս, Կանադայից մինչեւ Մ. Նահանգներ, Ֆրանսիայից ու Մ. Բրիտանիայից մինչեւ Լիբանան եւ աշխարհի այլ վայրերն ընդգրկող միջազգային մամուլի էջերը կարողանանք ողողել փաստավավերագրական արժանահավատ հակադարձություններովՙ չեզոքացնելու համար Գալիպոլիի եւ դրան հաջորդող մյուս ֆարսերը: Սա անշուշտ պահանջում է հիմնավորված քննախոսությունների պատրաստում եւ զգալիորեն մեծ գումարների ներդրում:
Ցանկանո՞ւմ ենք, կարո՞ղ ենք եւ վերջապես ի վիճակի՞ ենք ընդունելու այս մարտահրավերը:
