ՎԱՀԱԳՆ ՉԱԽԱԼՅԱՆ, 14.01.2015 թ.
Վրացական «Գռուզիա օնլայն» կայքում տպված, այնուհետեւ մի շարք ադրբեջանական կայքերի կողմից արտատպված, նոյեմբերի 13-ին ոմն Կարինե Գրիգորյանի կողմից արված հրապարակումը, ըստ որի իբր թե եսՙ Վահագն Չախալյանս, Ջավախքում կազմավորել եմ 60-70 անձից բաղկացած զինված խմբավորում` ցանկանալով տեղում իրականացնել անհնազանդություն, ծիծաղելի է, անհեթեթություն եւ իրականության հետ ոչ մի աղերս չունի:
Պարզորոշ է, որ այս ապատեղեկատվությունըՙ սեփական քաղաքական կերպարի վերակենդանացման փորձեր անող Մ. Սաակաշվիլու պատվերով իրականացված, հերթական հիվանդագին դրսեւորման արդյունքն է, հերթական սադրանքը, ձեռագիրՙ որով վերջիններս տարիներ շարունակ ցանկացել եւ այսոր էլ ցանկանում են Վրաստանի ապակայունացման հետ մեկտեղ թշնամանք սերմանել իրար կողք դարերով համերաշխ ապրած երկու քրիստոնյա ժողովուրդների միջեւ :
Ինչպես իմ, այնպես էլ ջավախահայության համար խիստ կարեւոր է Ջավախքի եւ ողջ տարածաշրջանի կայունության պահպանումը եւ խաղաղ, բնականոն զարգացումը, որի համար մենք չենք խնայել եւ հետագայում եւս չենք խնայելու ոչ մի միջոց ու ջանք:
Իմ ազատ արձակաման լուրից «ցնցված», այդ ցնցումից զբաղեցրած պաշտոնից հրաժարված, այնուհետեւ այդ «հայրենանվեր» քայլի համար Պատվո Օրդենի շքանշանի արժանացած այս տիկինի հայտարարությունը, որքան էլ անհեթեթ, այդուհանդերձ իր մեջ պարունակում է ծանրագույն մեղադրանքներ, եւ շարունակությունն է այն հայատյաց , ազգամիջյան թշնամանք հարուցող հայտարարությունների շքերթին, որոնք տարիներ ի վեր հնչել են Սահակաշվիլու եւ նրա թիմակիցների շուրթերից: Ելնելով այդ հանգամանքիցՙ կոչ եմ անում Վրաստանի պատկան մարմիններին վերջապես միջոցներ ձեռնարկել եւ պարզել մեղադրանքը հնչեցրած անձնավորության «աղբույրները», ինչպես նաեւ պարզել սադրիչ ապատեղեկատվության հրապարակման իրական պատվիրատուներին, վերջիններիս հետապնդած իրական նպատակները եւ պատասխանատվության կանչել բոլոր մեղավորներին:
Վրաստանի եւ ոչ մի քաղաքացի, անգամ կորցրած պաշտոնը հետ բերելու հիվանդագին մոլուցքից տառապող Միխայել Սաակաշվիլին, իրավունք չունի ազգամիջյան ատելություն եւ անվստահություն առաջացնող հայտարարություններ տարածել, անկախ նրանից , թե որ ազգի, կամ կրոնի ներկայացուցչի բերանով է այն տարածում …
