Ուոթերթաունում (Մասաչուսեթս) գտնվող Թեքեյան Մշակութային միության Մ. Նահանգների եւ Կանադայի գլխավոր վարչությունից ստացված հաղորդագրությունը տեղեկացնում է, որ վարչության գործադիր տնօրենի թափուր պաշտոնը այսուհետ կզբաղեցնի հարգված մտավորական, «Արարատ» եռամսյա հանդեսի նախկին գլխավոր խմբագիր Արամ Արքունը: Նա միջազգային հարաբերությունների գծով մագիստրոսի կոչում է ստացել Պենսիլվանիայի համալսարանից, եղել է տնօրենի օգնական Գրիգոր եւ Կլարա Զոհրապ տեղեկատվական կենտրոնում, ինչպես նաեւ պրոֆեսորի օգնական Նյու Յորքի համալսարանում: Տիրապետում է բացի հայերենից, անգլերեն, ֆրանսերեն, թուրքերեն եւ որոշ չափով նաեւ պարսկերեն, ռուսերեն, գերմաներեն եւ արաբերեն լեզուներին:
«Բախտավոր ենք, որ նման տաղանդավոր անձնավորության հետ ենք աշխատելու իրագործելու համար մեր մշակութային եւ կրթական ծրագրերը Ամերիկայում, Կանադայում եւ Հայաստանում», նշել է այդ առթիվ ԹՄՄ-ի Կենտրոնական վարչության նախագահ դոկտ. Հարություն Արզումանյանը:
Շնորհավորում ենք Արամ Արքունին իր նոր պաշտոնի կապակցությամբ եւ մաղթում բեղմնավոր գործունեություն:
