Հուլիսի 17-ի երեկոյան Ուկրաինայի երկնքում մալայզիական ավիաընկերության Ամստերդամ-Կուալա Լումպուր MH17 չվերթի «Բոինգ 777» օդանավի հետ պատահած ողբերգական միջադեպը տարաբնույթ արձագանքների ու գործողությունների առիթ դարձավ: «Պարիզիեն» օրաթերթը հաղորդում է մի յուրօրինակ հակազդեցության մասին: Դարձյալ մալայզիական ավիաընկերության A380 էրբասը հուլիսի 21-ին Լոնդոնից Կուալա Լումպուր թռչելիս շեղվել է Ուկրաինայի վրայով անցնող սովորական երթուղուց եւ նախընտրել է անցնել բավական հարավ ընկած Սիրիայի տարածքի վրայով: Խոսքը «Մալայզիա էյրլայնզ» ավիաընկերության մասին է, որի «Բոինգը» այս տարվա մարտին անհետացել էր Հնդկական օվկիանոսի վրա:
Ուկրաինան դարձել է այնքան անապահով եւ անվստահելի երկիր, որ մալայզիական A380-ի անձնակազմը անսպասելիորեն փոխել է երթուղին եւ նախընտրել է անցնել արդեն երեքուկես տարի պատերազմի մեջ ներքաշված Սիրիայի երկնքով:
Այս տարի օդանավային երկու խոշոր աղետների հետեւանքով բավականին վարկաբեկված մալայզիական ավիաընկերությունը հուլիսի 21-ի միջադեպի կապակցությամբ տարածած հայտարարության մեջ փորձել է արդարանալ հետեւյալ ձեւակերպմամբ. «Սիրիայի օդային տարածքը ենթակա չէր սահմանափակումների: Ամբողջ չվերթի ընթացքում էրբասը գտնվում էր Քաղաքացիակաան ավիացիայի միջազգային կազմակերպությանՙ ICAO-ի հավանությանն արժանացած օդային տարածքում»:
