«Ռոյթըրզ» լրատվական գործակալության հաղորդմամբ ճանաչված դերասաններ Բրեդ Փիթն ու Անջելինա Ջոլին Լոնդոնում մասնակցել են Մ. Բրիտանիայի արտգործնախարարության հովանավորությամբ անցկացված ընդդեմ պատերազմների ժամանակ սեռական ոտնձգությունների չորսօրյա գագաթաժողովին, որին ներկա են գտնվել ավելի քան 120 երկրներից մոտ 1200 կառավարական պաշտոնյաներ, դատավորներ, փաստաբաններ եւ հասարակական ակտիվիստներ:
Երեսունհինգամյա Ջոլիի ներգրավվածությունը մարդասիրական հարցերին սկսվել է 2001 թվականին, երբ նա Սիերա Լեոնե էր ժամանել որպես ՄԱԿ-ի փախստականների հարցերով զբաղվող հանձնակատարի բարի կամքի դեսպան եւ ականատես եղել քաղաքացիական պատերազմի հետեւանքներին: Մոտ 60 հազար կանայք էին բռնաբարվել հակամարտության ընթացքում: Իսկ Մ. Բրիտանիայի արտգործնախարար (այժմՙ նախկին) Ուիլյամ Հեյգի կապը Ջոլիի հետ սկսվել էր այն բանից հետո, երբ արտաքին գերատեսչության ղեկավարը դիտել էր վերջինիս 2011-ին նկարահանած ռեժիսորական առաջին «Արյունի եւ Մեղրի երկրում» ֆիլմըՙ 1992-95 թվականների բոսնիական պատերազմի մասին, որի ընթացքում ավելի քան 100 հազար մարդ էր զոհվել եւ մոտ 20 հազար կանայք բռնաբարվել:
Գագաթաժողովի ընթացքում լուսանկարների եւ ֆիլմերի ցուցադրություններով, զեկուցումներով եւ քննարկումներով փորձ է արվել մեկընդմիշտ դատապարտել բռնությունները հակամարտությունների եւ պատերազմների ժամանակ, նոր միջոցներ որոնել կանխելու դրանք եւ պատժելու մեղավորներին: «Ոչ մի ներում այդ մարդկանց», հայտարարել է Ջոլին: Իսկ արտգործնախարար Հեյգն իր ճեպազրույցում նշել է, որ Ջոլին կատարել է այն, ինչ վրիպել է հզոր տերությունների ուշադրությունից: «Նա շատ դեպքեր է ուսումնասիրել եւ որոշել նվիրվել բռնությունների զոհ դարձած կանանց դատի պաշպանությանը», ասել է նա: Ուիլյամ Հեյգը Անջելինա Ջոլիի հետ իր համագործակցությունը բացատրել է այն հանգամանքով, որ մարդիկ ընդհանրապես հակված չեն հավատք ընծայելու պետական պաշտոնյաներին, հետեւաբար մեծ ժողովրդականություն վայելող դերասանուհու ներգրավված լինելը համոզիչ է դարձնում խնդրի կարեւորությունը:
Հեյգն ու Ջոլին վստահեցրել են, որ գագաթաժողովը ծառայելու է վերջ դնլու անպատժելիության մթնոլորտին, որ մինչեւ այժմ գործում է պատերազմների ժամանակ սեռական ոտնձգությունների ոլորտում:
«Ռոյթերզը» հիշեցնում է, որ գագաթաժողովին նախորդել էին մի քանի ցնցող դեպքեր աշխարհի տարբեր վայրերում, այդ թվում 200 նիգերիացի աշակերտուհիների առեւանգումը, պակիստանցի հղի կնոջ ցմահ քարկոծումը եւ 2 հնդկուհիների խմբային բռնաբարումն ու սպանությունը:
Անցյալ տարի Հեյգն ու Ջոլին հայտարարություն էին հրապարակել, որի տակ այժմ արդեն մոտ 150 երկրներ ստորագրել են, կոչ անելով հետապնդել հանցագործներին եւ պատժել մեղավորներին: Այս տարի նրանք ձեռնամուխ են եղել ստեղծելու միջազգային մի ուղեցույց, որի միջոցով հնարավոր կլինի փաստեր հավաքել, հետաքննել նման ոճրագործությունները եւ դատական գործ հարուցել:
Ըստ «Գարդիան» թերթի, գիտաժողովը իրազեկման բարձրացման հիանալի ամբիոն է ծառայել:
Խմբագրությունը կուզենար իմանալ, թե որեւէ երկրից որեւէ հայ մասնագետ, ցեղասպանագետ, փաստաբան կամ հոգեբան մասնակցե՞լ է սույն գագաթաժողովին: Չէ՞ որ հազարավոր հայ կանայք անմասն չէին մնացել նման ոտնձգություններից Մեծ եղեռնի օրերին:
