Մարդու իրավունքների եվրոպական դատարանը հուլիսի 1-ին ընդունած վճռով գտնում է, որ Ֆրանսիայում մահմեդական կանանց մարմինն ու դեմքը ծածկող նիքաբի կամ փարանջայի արգելումը չի խախտում Մարդու իրավունքների եվրոպական կոնվենցիան, քանի որ օրենքի նպատակը կրոնական համոզմունքների համար մարդկանց հալածելը չէ:
Ֆրանսիայում 2011 թվականից արգելված է հասարակական վայրերում կրել փարանջա եւ դեմքը ծածկող այլ գլխաշորեր: Այդ օրենքի ընդունումից հետո 24-ամյա մի մահմեդական ֆրանսուհի Մարդու իրավունքների եվրոպական դատարանին հայց էր ներկայացրել մարդու իրավունքների խախտման վերաբերյալ:
Եվրոդատարանը փաստորեն մերժեց հայցը, իր վճիռը բացատրելով նրանով, որ օրենքը ոչ թե ոտնահարում է քաղաքացիների իրավունքները, այլ պաշտպանում է շրջակա մարդկանց դեմքերը տեսնելու մարդու իրավունքը:
Այն ժամանակվա նախագահ Նիկոլա Սարկոզին օրենքի ընդունումից առաջ հայտարարել էր, որ փարանջան եւ նիքաբը Ֆրանսիայում տեղ չունեն, քանի որ նման հագուստը հակասում է հանրապետության արժեքներին եւ մարդկային արժանապատվության վերաբերյալ ֆրանսիացիների պատկերացմանը:
