ԼՅՈՒՍԻ ԻՇԽԱՆՅԱՆ

Հ. Ծ.

Նյու Յորք քաղաքի հիվանդանոցներից մեկում 80 տարեկանում վախճանվել է միջազգային ճանաչման արժանացած տաղանդավոր դաշնակահարուհի Լյուսի Իշխանյանը, տեղեկացնում է «Արմինյն Միրոր-Սփեքթեյթր» շաբաթաթերթը, լուրը արտատպելով «Նյու Յորք Թայմսից»: Մոսկվայում կայացած Չայկովսկու անվան միջազգային երկրորդ երաժշտական փառատոնում «Հատուկ մրցանակի» արժանանալով, Իշխանյանը 1962-1979 թվերին ինն անգամ համերգային շրջագայություններով հանդես էր եկել նախկին Խորհրդային Միության հանրապետություններում: Նաեւ Մ. Նահանգների պետքարտուղարության մշակութային ծրագրի շրջանակներում ելույթներ ունեցել Մերձավոր Արեւելքի, հարավարեւելյան Ասիայի, արեւմտյան Եվրոպայի երկրներում, Արգենտինայում եւ Մ. Նահանգներում: Եղել է ամենաերիտասարդ աշակերտը, որ երբեւէ ընդունվել է հեղինակավոր Ջուլյարդ երաժշտանոցի նախապատրաստական բաժինը: Ընդունելվուց երկու տարի անց իր առաջին համերգն է տվել: Կրթաթոշակ ստանալով նա 15 տարի սովորել է Ջուլյարդումՙ ստանալով բակալավրի եւ մագիստրոսի աստիճաններ: Այնուհետեւ շարունակել է ուսումը Կոլումբիա համալսարանում եւ պաշտպանել դոկտորական: Նրա մեծագույն նվաճումներից կարելի է համարել Ջուլյարդի եւ Երեւանի Կոմիտասի անվան երաժշտանոցի միջեւ բարեկամության ծրագրի հիմնադրումը, որով հնարավորություն ընձեռվեց երեւանցի ուսանողներին շարունակելու իրենց ուսումը Նյու Յորքում: Իշխանյանը Կոմիտասի անվան երաժշտանոցի պատվավոր պրոֆեսոր էր եւ քանիցս նախագահել է ավարտական քննությունների հանձնաժողովները: Իշխանյանը նաեւ դաշնամուրի միջազգային մի շարք մրցույթների ժյուրիի անդամ էր: