Ֆինլանդիայի Վանտաա քաղաքում կայացավ նաեւ ազատ ոճի ըմբշամարտի Եվրոպայի առաջնությունը: Հայաստանը մրցաշարում նվաճեց երեք մեդալ:
70 կգ քաշային կարգում Գրիգոր Գրիգորյանը պայքարն սկսեց 1/8 եզրափակիչից: Հայ ըմբիշը մինչեւ եզրափակիչ հաղթելով բոլոր մրցակիցներին` ոսկե մեդալի համար պայքարում հաշվի մեծ տարբերությամբ պարտվեց Ադրբեջանի ներկայացուցիչ Ռուսլան Դիբիրգաջիեւին:
Հայ ըմբիշներից Եվրոպայի առաջնության բրոնզե մեդալակիր դարձան Մուսա Մուրթազալիեւը եւ Գարիկ Բարսեղյանը: 57 կգ քաշային կարգում հանդես եկող Բարսեղյանի նվաճած մեդալը առաջինն էր Հայաստանի համար: 86 կգ քաշային կարգում Մուրթազալիեւը նույնպես երրորդ տեղը զբաղեցրեց:
Ազատ ոճայինների հավաքականի գլխավոր մարզիչ Արայիկ Բաղադյանը գոհ է արդյունքից. «Մեր միակ բացթողումն այն էր, որ աշխարհի եւ Եվրոպայի չեմպիոն Դավիթ Սաֆարյանը բացակայում էր: Երեք մեդալ ունեցանք. իհարկե, լավ արդյունք է: Վստահ եմ` եթե Դավիթը լիներՙ թիմային հաշվարկով երրորդ տեղը կզբաղեցնեինք»:
Նշենք, որ Հայաստանի հավաքականի մյուս ներկայացուցիչները մեդալներ չեն նվաճել, իսկ թիմային հաշվարկով գրավել են 6-րդ տեղը:
